Беларускія дэмсілы абмеркавалі дапамогу палітвязням з прадстаўнікамі Еўракамісіі

Прадстаўнікі дэмакратычных сіл абмеркавалі дапамогу палітычным зняволеным і рэпрэсаваным беларусам у выгнанні з прадстаўнікамі DG ENEST. Гэта падраздзяленне Еўракамісіі, якое адказвае за перамовы аб пашырэнні. Дырэктарат таксама кіруе праграмамі фінансавай і тэхнічнай дапамогі для краін “Усходняга партнёрства”.

Як паведамілі ў АПК, беларускі бок прадстаўлялі Вольга Зазулінская і Юлія Міцкевіч, Генеральны дырэктарат па пашырэнні і ўсходнім суседстве — Міхал Юзвяк і Каломб дэ Мерсе.

У парадку дня перамоваў былі:

• рэпрэсіі ў Беларусі, іх транснацыянальны характар і наступствы,
• дапамога палітычным зняволеным і рэпрэсаваным беларусам у выгнанні,
• праблема пратэрмінаваных пашпартоў беларусаў і шляхі яе вырашэння,
• новыя магчымыя рызыкі для беларусаў у выпадку пашырэння вайны з Украінай,
• выбары ў Каардынацыйную раду і ўзаемадзеянне трох палітычных інстытутаў дэмакратычных сіл.

«У размове з нашымі еўрапейскімі партнёрамі я падняла тэму доўгатэрміновай падтрымкі людзей, якія часта аказваюцца па-за паўнавартасным доступам да нацыянальных сістэм сацыяльнай абароны: беларусаў у вымушанай эміграцыі, былых палітвязняў, ветэранаў вайны ва Украіне, пажылых людзей, людзей з інваліднасцю, сем’яў з дзецьмі з асаблівасцямі развіцця, жанчын, ЛГБТК+ персон.

Асобна абмеркавалі неабходнасць не толькі кропкавай дапамогі, але і сістэмнага механізму, які дазволіць такім людзям атрымліваць доступ да сацыяльных праграм у краінах фактычнага пражывання — у тым ліку ў Польшчы, Літве і іншых краінах ЕС. Для нас важна, каб уразлівыя групы не заставаліся паміж прававымі статусамі і адміністрацыйнымі сістэмамі, а мелі зразумелы шлях да абароны, падтрымкі і інтэграцыі», — расказала Вольга Зазулінская.

«Мы абмеркавалі, у тым ліку, прыроду рэпрэсій, якая змяняецца, і з’яўленне новых форм катаванняў. Як, напрыклад, кейсы немагчымасці аб’яднання з непаўналетнімі дзецьмі вызваленых палітычных вязняў, паколькі падчас зняволення яны былі абмежаваныя ў бацькоўскіх правах.

Нам было важна пачуць, што пра гэта на ўзроўні ЕС вядуцца перамовы з амерыканскім бокам, у прыватнасці з тымі, хто ўключаны ў дыялог з рэжымам. І што нашы еўрапейскія партнёры працягваюць даносіць інфармацыю пра такія гісторыі.

Як і тое, што яны настойваюць: пры вызваленні палітвязняў не павінна прымяняцца практыка прымусовай дэпартацыі без магчымасці самастойна прыняць рашэнне застацца ў краіне або з’ехаць, ці пазбаўлення вызваленых усіх дакументаў і легальных магчымасцей працягваць жыць у Беларусі», — дадала Юлія Міцкевіч.