Фото: lodzka.policja.gov.pl
Грамадзянін Беларусі ледзь не загінуў па дарозе на працу ў Польшчы. Яго ўратавалі паліцэйскія, якія выпадкова апынуліся побач.
Днём 5 снежня чацвёра паліцэйскіх вярталіся з навучання з горада Серадз Лодзінскага ваяводства. На трасе S8 яны заўважылі аўтамабіль Dacia, які раптам пачаў з’язджаць управа, заехаў на суцэльную лінію і ўрэзаўся ў сталёвую агароджу дарогі. Пасля ўдару машына загарэлася.
Паліцыянты з’ехалі на ўзбочыну, выклікалі экстраныя службы, дасталі кіроўцу праз дзверы з пасажырскага боку і пачалі тушыць аўтамабіль да прыбыцця пажарных, паведамляе паліцыя Лодзі.
Кіроўца аказаўся 34-гадовым беларусам. Ён патлумачыў, што заснуў за рулём па дарозе на працу. Яго гаспіталізавалі з траўмамі.