Французскі дэпутат: без урэгулявання крызісу ў Беларусі немагчыма забяспечыць бяспеку Еўропы

Рэдакцыя Reform.news · 2 кастрычніка 2026, 16:12

https://reform.news/be/francuzski-djeputat-bez-urjeguljavannja-kryzisu-belarusi-nemagchyma-zabjaspechyc-bjaspeku-e-ropy/

Без урэгулявання ўнутрыпалітычнага крызісу ў Беларусі немагчыма забяспечыць бяспеку Еўропы, заявіў Фрэдэрык Пеці, кіраўнік парламенцкай групы «За дэмакратычную Беларусь», член Камісіі па міжнародных справах Нацыянальнага сходу Францыі, на сустрэчы з намеснікам кіраўніка АПК і кіраўніком НАУ Паўлам Латушкам.

На сустрэчы абмяркоўваліся стратэгія і роля Францыі ў пазіцыі ЕС па падтрымцы дэмакратычных сіл Беларусі, пытанні рэгіянальнай бяспекі, роля Лукашэнкі ў падтрымцы агрэсіі Расіі супраць Украіны, важнасць працягу ціску на рэжым Лукашэнкі, падыходы да вызвалення беларускіх палітвязняў, паведамляе АПК.

Пеці адзначыў, што Беларусь з’яўляецца часткай вырашэння рэгіянальнага крызісу і без урэгулявання ўнутрыпалітычнага крызісу ў Беларусі немагчыма забяспечыць бяспеку Еўропы.

Латушка прадставіў стратэгію ў дачыненні да Беларусі: ЗША ўздзейнічаюць на рэжым Лукашэнкі і дамагаюцца вызвалення палітвязняў у абмен на зняцце санкцый, а Еўрасаюз выкарыстоўвае інструменты ціску і санкцый для дасягнення сістэмных змен у Беларусі.

Бакі асобна абмеркавалі магчымую падтрымку Францыяй правядзення круглага стала па выхадзе з унутрыпалітычнага крызісу ў Беларусі.