Сейм Літвы прагаласаваў за падаўжэнне абмежаванняў у дачыненні да грамадзян Беларусі і РФ

Рэдакцыя Reform.news · 15 красавіка 2026, 08:18

https://reform.news/be/sejm-litvy-pragalasava-za-pada-zhjenne-abmezhavannja-u-dachynenni-da-gramadzjan-belarusi-i-rf/

Сейм Літвы ў аўторак падтрымаў законапраект аб падаўжэнні абмежаванняў у дачыненні да грамадзян Беларусі і Расіі. Для канчатковага зацвярджэння законапраекта спатрэбіцца яшчэ адно галасаванне.

За праект прагаласавалі 102 дэпутаты, 4 былі супраць і 6 устрымаліся.

На дадзены момант законапраект не прадугледжвае змяненняў у абмежаваннях, якія дзейнічаюць супраць грамадзян Беларусі і Расіі. Яны падаўжаюцца да 31 снежня 2027 года. Таксама ў законе прапісваецца забарона на ўвоз у баках транспартных сродкаў больш за 200 літраў паліва.

Дзейныя абмежаванні датычацца выдачы шэнгенскіх віз, перасячэння мяжы. Таксама абмежаваны магчымасці падачы на ВНЖ для грамадзян Расіі, куплі імі нерухомасці. Падчас разгляду ў Сейме было прапанавана ўраўняць абмежаванні ў дачыненні да беларусаў і расіян, але ў праекце, які быў вынесены на галасаванне ў аўторак, дадзеныя папраўкі адсутнічаюць. З імі не пагадзіўся Камітэт па замежных справах.