Рыжанкоў і Лаўроў спадзяюцца «на хутчэйшае ўрэгуляванне абстаноўкі» ў Іране

Рэдакцыя Reform.news · 13 студзеня 2026, 14:32

https://reform.news/be/ryzhanko-i-la-ro-spadzjajucca-na-hutchjejshae-rjeguljavanne-abstano-ki-irane/

Міністры замежных спраў Беларусі і Расіі Максім Рыжанкоў і Сяргей Лаўроў спадзяюцца «на хутчэйшае ўрэгуляванне абстаноўкі» ў Іране. Пра гэта гаворыцца ў паведамленні МЗС Беларусі пра тэлефонную размову двух міністраў.

Паводле інфармацыі знешнепалітычнага ведамства, яны абмеркавалі актуальныя пытанні двухбаковых адносін, графік маючых адбыцца сустрэч і мерапрыемстваў на высокім і найвышэйшым узроўнях.

Акрамя таго, прадметам абмеркавання стала сітуацыя ў Іране і Венесуэле.

«Кіраўнікі знешнепалітычных ведамстваў Беларусі і Расіі адзначылі недапушчальнасць замежнага ўмяшання ва ўнутраныя справы іншых дзяржаў і выказалі надзею на хутчэйшае ўрэгуляванне абстаноўкі ў Ісламскай Рэспубліцы Іран», — гаворыцца ў паведамленні МЗС.

Нагадаем, з канца снежня ў Іране працягваюцца пратэсты, якія ўлады пакуль не могуць задушыць. Пры гэтым прэзідэнт ЗША Дональд Трамп неаднаразова заяўляў, што можа падтрымаць пратэстоўцаў у тым ліку сілай.