Каля пешаходнага моста ў Варшаве заўважылі характэрную стрытартаўскую «інтэрвенцыю» беларускага мастака Міхася Мішука. Даволі вялікі вадалаз у яркім памаранчавым скафандры быў пагружаны ў ваду па плечы.
Распыталі мастака пра новую інтэрвенцыю.
«Гэтага вадалаза я зрабіў яшчэ ў мінулым годзе, не памятаю ўжо для чаго, магчыма для «Варушняка», — расказаў Reform.news Міхаcь Мішук. — Ён зборна-разборны. Летаcь ён стаяў на зямлі, але сёлета вырашыў усталяваць яго на вадзе, што лагічна…
Спачатку сабраў яго на возеры, а пасля вырашыў перанесці ў Віслу. Я ўвосень з’язджаю з Варшавы, таму паціху пазбаўляюся ад грувасткіх рэчаў.
Я яго не адзін ставіў, а са знаёмымі хлопцамі: яны ўсё гэта здымалі для фільма, але гэта не дакладна, таму што гэтага фільма, можа, і не будзе. Затое цудоўна павесяліліся: ставілі ўвечары, калі ўжо сцямнела. Ніхто нічога б не ўбачыў, але хлопцам для здымкі патрэбна было святло, і яны сваімі прыборамі падсвяцілі маё хуліганства.
І на набярэжнай сабралася куча людзей, добра, хоць паліцыі не было. Але я хутка ўсё зрабіў, абышлося без надзвычайных здарэнняў. Не ведаю, колькі ён там прастаіць, калі камунальныя службы не прыбяруць, можа, і да вясновай паводкі», — мяркуе мастак.
Вадалазы Міхася Мішука – ужо культавыя для Варшавы аб’екты, хоць клеіць ён іх у розных гарадах свету. Прыдумаў гэтых вадалазаў мастак у Мінску, яшчэ ў 2013 годзе. Гэта ўмоўны вобраз яго самога – адзінокага чалавека ў футляры, што плыве па горадзе ў ахоўным касцюме.
У маі Міхась Мішук зладзіў персанальную «паралельную праграму» на Венецыянскім біенале, прыклеіўшы ў горадзе свае фірмовыя выявы вадалазаў.
Чытаць інтэрв’ю з Міхасём Мішуком можна тут.
Падпісвайцеся на культурныя навіны Reform.news у Telegram
