Раніцай 15 верасня ў Нідэрландах адбыўся масавы збой у руху цягнікоў.
Кампанія — аператар чыгунак Нідэрландаў ProRail заявіла, што раніцай у некалькіх месцах на пуцях былі выяўленыя трубы і кабелі, што выклікала збоі ў працы сістэм кантролю ўчасткаў пуці.
ProRail заявіла пра магчымы сабатаж.
«На гэты момант гэта выглядае як наўмыснае парушэнне руху цягнікоў у выніку дзеянняў чалавека. Хто нясе за гэта адказнасць і які матыў — пакуль невядома», — паведамляла кампанія.
У некаторых выпадках прадметы прыбіралі з пуцей, але сігнал пра збой зноў паступаў з таго ж месца.
Усяго з раніцы да 13:00 было зафіксавана больш за 35 збояў. У адным выпадку цягнік сутыкнуўся з прадметам на пуцях, але гэта не прывяло да сур’ёзных наступстваў.
Паліцыя праводзіць расследаванне.
Паводле інфармацыі нідэрландскага выдання NOS, да інцыдэнту могуць быць датычныя фермеры, якія пратэстуюць.
