Сёння ўначы ў Літве быў збіты беспілотнік. Ён заляцеў у паветраную прастору краіны неўзабаве пасля поўначы. Была абвешчаная паветраная трывога. Аэрапорт Вільні прыпыняў працу.
Прыкладна ў 0:20 дрон быў знішчаны ў паветры. Яго збілі ў раёне Кайшадорыса пад Каўнасам. На перахоп беспілотніка падымаліся італьянскія знішчальнікі, якія базуюцца ў Шаўляі.
Паводле папярэдніх даных, дрон, меркавана, уляцеў у Літву з тэрыторыі Беларусі.
«Так, з Беларусі. Затым Лентварыс, Тракайскі раён, менавіта адтуль аб’ект рухаўся на захад”, – заявіў кіраўнік Нацыянальнага цэнтра кіравання крызісамі Вілмантас Віткаўскас, перадае LRT.
Уначы літоўскія вайскоўцы і паліцыя выявілі абломкі збітага беспілотніка недалёка ад населенага пункта Праткунай, які знаходзіцца паблізу Круоніскай гідраакумулюючай электрастанцыі.
Гэта першы выпадак знішчэння беспілотніка ў небе Літвы. Раней знішчальнікі краін НАТА ўжо збівалі дроны ў Латвіі і Эстоніі.