«Трывай ледзь, але дыхай назло ім» – J:МОРС выдалі новую песню пра тое, што дапамагае

У дзень народзінаў свайго лідара Уладзіміра Пугача гурт J:МОРС прэзентуе новы сінгл «Зброя», у якім апавядае пра перажытае, пра тое, што дапамагае, пра надзею.

– Чым далей ад дома, тым больш яго не хапае, тым вастрэй адчуваеш сябе яго часткай. Шукаеш сябе ў свеце, знаходзіш цэлы свет у сабе… «Зброя» – гэта песня-напамін. Як бы ні было цяжка, якія б перашкоды ні сустракаліся на шляху, якім бы змрочным часам ні здавалася жыццё – трымайся, усміхайся, ідзі наперад разам з такімі ж, як ты. Спрабуй змяняць сябе, пакрысе мяняючы свет вакол. Гэта і ёсць наша зброя… – пракаментаваў новую песню Уладзімір Пугач у Instagram гурта.

Вакалісту J:МОРС сёння споўнілася 48 гадоў. За апошні год да яго паспяховай музычнай кар’еры дадалося выдавецтва беларускамоўных аўдыякніг Litaralna. Нядаўна таксама стала вядома пра яго ўдзел у праекце «Купалаўцаў» паводле «Зэкамерона» Максіма Знака. Паслухаць новую песню можна на ўсіх буйных музычных пляцоўках.

Падпісвайцеся на культурныя навіны Reform.by у Telegram