25 траўня 1917 года ў Ялце памёр самы малады класік беларускай літаратуры Максім Багдановіч. Штогод у гэты дзень аматары творчасці паэта ўшаноўваюць яго памяць.
У Музеі Максіма Багдановіча ў Гродне з 21 траўня працуе выстава «І вечна гарыць твая зорка…»
У экспазіцыі прадстаўлены фатаграфіі з прэм’еры спектакля «Зорка Венера», пастаўленага ў 1970 годзе на сцэне Дзяржаўнага акадэмічнага тэатра оперы і балета Беларусі, а таксама кнігі пра жыццё і творчасць паэта.
Літаратурны музей Максіма Багдановіча ў Мінску традыцыйна зладзіў ускладанне кветак да помніка Багдановічу ў скверы каля Вялікага тэатра. А ў 18.00 у музеі адбудзецца канцэрт ансамбля «Класік-Авангард» пад кіраўніцвам Людмілы Каліноўскай. У праграме прагучаць сусветна вядомыя творы, звязаныя з паэтам і сям’ёй Багдановічаў.
Максім Багдановіч (1891–1917) — геній беларускай паэзіі, які стаў сімвалам беларускага Адраджэння, напісаўшы такія кананічныя вершы, як «Зорка Венера» і «Пагоня». У яго выйшла адзіная прыжыццёвая кніга «Вянок». Багдановіч узбагаціў тэматыку беларускай літаратуры і паспрыяў засваенню ёй новых форм. З яго лёгкай рукі на беларускай мове арганічна загучалі трыялеты, тэрцыны, рандо, пентаметры, гекзаметры… Пераклаў на беларускую Гейнэ, Верлена, Байрана.
Падпісвайцеся на культурныя навіны Reform.news у Telegram