Ва ўмовах нарастальнай пагрозы з боку Расіі Польшча прымае меры па захаванні нацыянальнай спадчыны. Міністр культуры Ганна Урублеўска паведаміла ў інтэрв’ю Financial Times, што ідзе падрыхтоўка да патэнцыйнай эвакуацыі найбольш каштоўных культурных каштоўнасцяў. Паводле яе слоў, польскія музеі больш не могуць працаваць у рамках тэарэтычнай канцэпцыі бяспекі.
План па абароне музейных калекцый з’яўляецца часткай больш шырокай дзяржаўнай праграмы па павышэнні ўзроўню бяспекі, якая, у прыватнасці, прадугледжвае павелічэнне колькасці арміі да 500 тысяч салдат і ўмацаванне межаў. Дэталі распрацоўвае Мацей Матысяк — былы палкоўнік польскага войска і намеснік кіраўніка вайсковай контрвыведкі, які цяпер узначальвае Дэпартамент бяспекі і кіравання крызіснымі сітуацыямі ў Міністэрстве культуры.
«Нам быў патрэбны чалавек, які працаваў у войску, але таксама разбіраецца ў антыкрызісным кіраванні», — патлумачыла Урублеўска.
План ахоплівае абарону і транспарціроўку не толькі карцін і скульптур, але таксама ўнікальных кніг і музычных інструментаў прыкладна з 160 дзяржаўных устаноў культуры. Міністэрства таксама вядзе перамовы з іншымі краінамі, якія маглі б часова прыняць эвакуіраваныя экспанаты. Міністр дадала, што аналагічных дзеянняў чакаюць і ад прыватных музеяў і галерэй.
Польшча грунтуецца на досведзе, атрыманым падчас дапамогі Украіне ў эвакуацыі яе калекцый пасля расійскага ўварвання ў 2022 годзе. Акрамя самой эвакуацыі твораў мастацтва, прымаюцца меры па абнаўленні і дапаўненні дакументацыі, што мае ключавое значэнне для іх наступнага вяртання.
Адным з галоўных выклікаў, па словах міністра культуры, з’яўляецца адбор твораў, якія падлягаюць «прыярытэтнай эвакуацыі», таму што выратавацца ўсё немагчыма.
Падобныя меры разглядаюць таксама і балтыйскія краіны — Літва, Латвія і Эстонія.
Падпісвайцеся на культурныя навіны Reform.news у Telegram