23 траўня ў Варшаве адбудзецца прэзентацыя новай кнігі Паўла Севярынца «Беларусь — гэта святое». У выданні сабраныя вершы і малюнкі беларускага палітыка, якія ён ствараў, будучы ў зняволенні.
«Тут сабраны 71 малюнак беларускіх храмаў, якія я маляваў у турмах і калоніі Францішку, пакуль не забаранілі адсылаць, а таксама 71 выслоўе і 22 вершы.
Вершы даводзілася вучыць на памяць, бо ў апошнія гады лісты з вершамі з турмы таксама не выпускалі. Большасць з гэтых вершаў нідзе не публікавалася», — распавёў аўтар пра выданне.
Пра тое, як да Паўла прыйшла ідэя маляваць храмы ў зняволенні расказвала «Вясне» некалькі гадоў таму Вольга Севярынец.
«Спачатку Павел маляваў Францішку машынкі і іншы транспарт, у якасці падарунка, бо Францішак вельмі цікавіцца гэтай тэмай, а пасля вырашыў, каб таксама «выхоўваць у сына пачуццё прыгожага», маляваць храмы. Людзі дасылалі Паўлу шмат паштовак з беларускімі краявідамі, ён перамалёўвае храмы з іх. Калі Павел пачынаў маляваць храмы, мы не думалі, што будзем рабіць з імі паштоўкі. Гэта ідэя ўзнікла неяк сама сабой, калі мы сабралі калекцыю з дзесяці малюнкаў цэркваў і касцёлаў. Паштоўкі былі прынятыя вельмі цёпла, было шмат добрых водгукаў і падзякаў».
Цяпер малюнкі палітычнага дзеяча можна паглядзець пад адной вокладкай.
Павел называе Варшаву «эпіцэнтрам беларускага руху» і асабліва запрашае на сустрэчу: паплечнікаў па Беларускай Хрысціянскай Дэмакратыі, тых, хто хоча далучыцца да БХД, усіх сяброў па сацыяльных сетках, каб нарэшце сустрэцца ўжывую і «развіртуаліцца».
Час і месца: 23 траўня, 16:00, Варшава, Беларусі дом (Kryniczna, 6).
Падпісвайцеся на культурныя навіны Reform.news у Telegram
