Культавы пластычны тэатр «ІнЖэст» закрыўся. Пра гэта паведаміла «Еўрарадыё» са спасылкай на ўдзельніка праекта.
«Тэатр, на жаль, афіцыйна больш не існуе. У красавіку канчаткова вывезлі дэкарацыі», — расказаў пра закрыццё ўнікальнага тэатра адзін з яго ўдзельнікаў. Па словах візаві, кіраўнік праекта Вячаслаў Іназемцаў цяпер жыве ў Японіі.
18 траўня «ІнЖэст» мусіць быў адзначыць свае 40-годдзе.
Нагадаем, што слынны арт-праект згубіў месца для рэпетыцый яшчэ ў 2024 годзе. «Благодаря бдительному МЧС», — удакладнілі тады ўдзельнікі. Яшчэ ў верасні 2025 года каманда шукала памяшканне для захавання рэквізіту.
Што датычна выступленняў «ІнЖэсту», то яны былі спынены яшчэ ў верасні 2021 года. У 2020 годзе артысты тэатра запісалі відэазварот, у якім выказаліся супраць фальсіфікацыі выбараў, і гэтага ім не даравалі.
Пластычны тэатр «ІнЖэст» быў створаны студэнтамі мінскага Інстытута культуры. Першая пастаноўка тэатра — пантаміма «Шляхі і сцены» — была паказана 18 мая 1981 года. Паступова «ІнЖэст» ператварыўся ў адметную з’яву тэатральнага жыцця Беларусі. Спектаклі тэатра вылучалі яркія касцюмы, незвычайныя дэкарацыі, музыка і неверагодная пластыка актораў. Часта ўсё гэта адбывалася ў нечаканых інтэр’ерах, накшталт закінутага заводскага памяшкання.
З 1995 года тэатр ствараў спектаклі ў японскай авангарднай тэхніцы Буто. «ІнЖэст» злучаў пластычныя традыцыі Усходу і Захаду. Удзельнік шматлікіх міжнародных фестываляў, адзін з заснавальнікаў беларускага фестываля «ПлаSтформа». Сярод вядомых спектакляў 2010-х: «Пасля», «Доступ да цела», «ДК Данс», ды іншыя.
Падпісвайцеся на культурныя навіны Reform.news у Telegram
