Тэксты Уладзіміра Караткевіча, Валярыны Куставай, Алеся Плоткі (вядомага пад псеўданімам Baisan) і беларускі фальклор у сучасным сімфанічным гучанні можна пачуць у новым альбоме «Na dně mojí duše» гурта RAZAM і Івы Марэшавай. Альбом быў запісаны разам з сімфанічным аркестрам філармоніі Градэц Краловэ. У гурце грае беларускі баяніст і кампазітар Аляксандр Ясінскі.
Праект «Na dně mojí duše» яднае world music, джаз і класічную музыку. Гэта глыбокае мастацкае і асабістае выказванне, насычанае сэнсамі, сімваламі і дэталямі.
Разам з запісам выходзіць і кліп на загалоўную песню «Na dně mojí duše» (symphonic), які перадае тэмы праўды, унутранага позірку і смеласці сустрэцца сам-насам з сабой. Рэжысёрам кліпа стаў Давід Корцына (David Korcina).
Тэкст песні, якая гучыць па-беларуску, напісаў паэт Алесь Плотка (Baisan).
Музыку стварылі Іва Марэшова разам з Аляксандрам Ясінскім і Радкам Долэжалам. Алесь Ясінскі, які таксама з’яўляецца аўтарам аркестровай аранжыроўкі, паходзіць з Баранавічаў і з 2011 года жыве і працуе ў Чэхіі.
«Калі мы заглядаем на дно сваёй душы і знаходзім у сабе сілы ўбачыць усё так, як ёсць — без упрыгожанняў і без празмернай дэманізацыі, нам застаецца толькі праўда, — кажа Іва Марэшова, — дно душы — для мяне гэта зыходны пункт, нуль, месца, з якога ўсё нараджаецца і з якога мы можам крочыць у любым кірунку».
Новы альбом музыкі прэзентуюць 6 красавіка 2025 года а 19:30 у Празе, Divadlo na Vinohradech. Спецыяльнымі гасцямі вечара стануць вядомы чэшскі актор Марэк Ламбора і фантастычны піяніст Ондржэй Кабрна.
Квіткі можна набыць тут.
Алесь Ясінскі прывязе плыту ў Польшчу і ў Літву, дзе выступіць з канцэртамі:
22/4 Przeswit, Варшава
23/4 Bialystok Music Club, Беласток
25/4 Create Culture Space, Вільнюс
26/4 Беларускі дом, Вільнюс
Падпісвайцеся на культурныя навіны Reform.news у Telegram