Фэстываль Tutaka. Выступ гурта "Дай дарогу!". Фота: reform.news
З 10 па 13 ліпеня ва ўрочышчы Барык на Беласточчыне праходзіць фестываль абуджаных Tutaka.
Канцэрты, выставы, кінапаказы, творчыя сустрэчы, публічныя дыскусіі – другі дзень фэсту бадай самы насычаны з усёй праграмы.
З раніцы прайшлі лекцыі Цімоха Акудовіча пра Радзівілаўскую мапу і пра пурызм у беларускай мове Арцёма Сізінцава.
Адбылася інтэрактыўная прэзентацыя Музея Вольнай Беларусі, паказалі дакументальны фільм «Дом там, дзе я?» рэжысёра Арцёма Лобача. Адбыліся прэзентацыі некалькіх кніг.
Бліжэй да абеда правялі вялікую дыскусію «Ці можна будаваць Беларусь па-за межамі Беларусі?», Вадзім Гліннік расказаў пра беларускую архітэктуру, Каця Ваданосава – пра мужчынскую і жаночую моду часоў паўстання Каліноўскага.
Вечарам прайшоў спекталь для дарослых «Granica» рэжысёра Антона Ільіна і яшчэ адна дыскусія «Беларусь вачыма свету». Адбылася сустрэча з зоркамі «Белсату» і нефармальныя сустрэчы з зоркамі музычнымі. А таксама шмат майстар-класаў і розных іншых цікавостак для дарослых і дзяцей.
Вечарам на фэст завітаў Сяргей Ціханоўскі. Сустрэча з ім запланаваная на нядзелю, 13 ліпеня. А сёння – нечаканая палітычна-гастранамічная неспадзяванка праграмы фествалю – першы джэнтэльмен падсмажыў адмысловыя катлеты «па-Ціханоўску» і раздаў іх удзельнікам фэсту. Падзея выклікала незвычайны ажыятаж.
Сяргей Ціханоўскі ў сваёй невялікай прамове сказаў, што гатовы паўтарыць гэтую акцыю для беларусаў у розных гарадах.
Разнастайная праграма – ад дыскусій і майстар-класаў да музычных выступаў – пройдзе і ў нядзелю, у апошні дзень фестывалю.
Кожны вечар запланаваны канцэрт, які пачынаецца ў 21.00 па польскім часе. Сёння чакаюць Spievy z-pad mosta, ILI-ILI, Dzieciuki, Krambambula.
Усе тры дні стрымы вечаровых канцэртаў можна паглядзець тут.
Падпісвайцеся на культурныя навіны Reform.news у Telegram