У Беластоку завяршыў працу 12-ты Кніжны кірмаш і 14-ты літаратурны фестываль «На сумежжы культур».
Быў арганізаваны шэраг аўтарскіх сустрэчаў і аўтограф-сесіяў.
У Салоне незалежных беларускіх выдавецтваў было прадстаўлена 15 выдаўцоў, а ў межах Літаратурнага фестывалю «На памежжы культур» адбылася аўтарская сустрэча з сёлетнім лаўрэатам Ляйпцыгскай кніжнай прэміі еўрапейскага паразумення Альгердам Бахарэвічам, які прэзентаваў сваю новую кнігу «Папяровы голем».
Арганізатарам Салону беларускіх выдавецтваў быў Цэнтр беларускай культуры ў Беластоку, які за няпоўных паўтара года дзейнасці выдаў пяць кніг, а таксама ілюстраваны каталог гістарычных і народных беларускіх строяў Кацярыны Ваданосавай. На выставе прэзентавалі «Żubr i inne opowiadania» Міхала Андрасюка, «Проста з любові. Рэпарцёрскія партрэты памяці» Ганны Кандрацюк, кнігу на беларускай лацінцы «Śvieciacca vokny dy nikoha za jimi» Уладзіміра Арлова і перавыданне ўспамінаў Ларысы Геніюш.
«Птушкі бяз гнёздаў. Успаміны» на беларускай і польскай мовах ажыццявілі Цэнтр беларускай культуры і Фонд Kamunikat.org. Новае выданне (першы раз успаміны Геніюш былі выдадзены ў 1993 годзе пад назвай «Споведзь») узбагацілася дадатковымі дакументамі і новымі фактамі. Успаміны паэткі выходзілі таксама па-чэшску пад назвай «Pani Doktorowa». Уладзімір Арлоў ва ўступным слове да кнігі адзначыў, што ўспаміны сталі галоўным творам паэткі, які і «сёння сваёй праўдай, болем і вераю апякае кожную жывую беларускую душу».
Госцем прэзентацыі быў таксама ўнук паэткі — Міхал Геніюш.
Падчас Кніжнага кірмашу адбыўся старт продажаў новай кнігі прозы Барыса Пятровіча «Цнота на потым» — захапляльнае падарожжа па пазнавальных краявідах Менска ды іншых гарадоў і мястэчак Беларусі, а таксама знаёмства з неардынарнымі асобамі, якія сталі героямі твораў.
А ў беларускім Хабе «Новая Зямля» прайшла сустрэча з Юляй Цімафеевай пад назвай «Аўтапартрэт у выглядзе костачкі авакада». Кніга-білінгва выйшла летась у люблінскім выдавецтве «Warsztaty Kultury» у перакладзе Богдана Задуры. «Падчас сустрэчы аўтарка паразважала пра ідэнтычнасць і мову, пра разломы і рост», — піша Цэнтр беларускай культуры ў Беластоку. Мадэратарам сустрэчы быў пісьменнік Альгерд Бахарэвіч.
Ля стэндаў беларускіх выдавецтваў можна было сустрэць не толькі беларусаў з дыяспары, але і падляшскіх беларусаў, якія згадвалі, што раней, каб купіць беларускую кніжку, трэба было ехаць, напрыклад, у Гродна.
Арганізатар Беластоцкага кніжнага кірмашу Анджэй Каліноўскі ў інтэрв’ю Беларускай службе Польскага радыё сказаў: «З-за вайны ва Украіне мы сталі забываць пра тых людзей, якія знаходзяцца ў эміграцыі. Яны павінны паказвацца, каб нагадваць, што ў Польшчы жыве шмат беларусаў, якія здольныя ствараць цікавыя рэчы. Цяпер у нас ёсць Цэнтр беларускай культуры ў Беластоку, які ўключыўся ў гэтую працу. Акрамя таго ёсць шэраг беларускіх выдавецтваў, якія актыўна працуюць, і не толькі ў Польшчы».
Падпісвайцеся на культурныя навіны Reform.news у Telegram