Прэс-сакратарка Аляксандра Лукашэнкі Наталля Эйсмант сёння падчас адкрыцця выставы падарункаў ад працоўных калектываў Аляксандру Лукашэнку ў Нацыянальнай бібліятэцы падзялілася, што найбольш папулярны экспанат у музеі Палаца незалежнасці, — гэта аўтамат.
«Раней увесь час нашы госці прасілі, [маўляў] сустрэча з прэзідэнтам пройдзе ці інтэрв’ю, калі ласка, правядзіце нас у зялёны пакой — паглядзець там [якія] інтэр’еры, атмасфера, — распавяла яна. — Зараз апошнія тры, чатыры гады, трошкі скарэктавалася, [людзі пытаюцца]: «Пакажыце аўтамат».
Нагадаем, 23 жніўня 2020 года пасля таго, як большая частка ўдзельнікаў дэманстрацыі ў Мінску адышла ад Палаца незалежнасці, Лукашэнка прыляцеў на верталёце ў сваю рэзідэнцыю. Ён выйшаў з аўтаматам. Яго суправаджаў сын Мікалай, які таксама быў узброены. Лукашэнка прывітаў АМАПаўцаў, якія стаялі ля палаца. Пазней аўтамат, з якім прылятаў Лукашэнка, быў выстаўлены ў Палацы незалежнасці ў якасці экспаната.
На выставе ж падарункаў працоўных калектываў Аляксандру Лукашэнку аўтамат выстаўлены не быў. На экспазіцыі знайшлося месца карцінам, сувенірам, мадэлям тэхнікі, вынікам навуковых адкрыццяў, ды іншым прадметам, паведамляе БелТА. Выстава, якая ладзіцца ў межах прапагандысцкай акцыі «Марафон адзінства», мае назву «З любоўю і ўдзячнасцю».
Падпісвайцеся на культурныя навіны Reform.news у Telegram