Шматкультурны фестываль «Barn+Field» («Клуня і Поле») прайшоў на ўскрайку польскага горада Бельска-Падляшскага ў трэці раз. Акрамя выканаўцаў з Польшчы, Беларусі і Ірландыі адбываліся майстар-класы, кулінарныя майстэрні і іншыя актыўнасці.
Фестываль праводзіцца на полі і каля клуні сям’і Фіёнікаў у Студзіводах (раён Бельска). Непадалёк знаходзіцца Музей малой Бацькаўшчыны, заснавальнікам якога з’яўляецца Дарафей Фіёнік. Адной з падзеяў фестывалю стаў адмысловы шпацыр па Студзіводах.
Цэнтр беларускай культуры ў Беластоку далучыўся да фестывалю, арганізаваўшы кліматычную фотабудку, а графік Юрка Асеннік стварыў для сцяны фестывальнай клуні мурал. Выдавецтва «Камунікат» прадавала на фестывалі беларускія кнігі.
У фестывальнай афішы былі беларускія гурты і выканаўцы: Mandzik, гурт мужчынскага традыцыйнага спеву «Касары», а таксама падляшскія «Жэмерва» і Sw@da x Niczos, дуэт, які прэзентаваў абноўленую версію праграмы #InDaChata Set.
Падпісвайцеся на культурныя навіны Reform.news у Telegram
