1 красавіка ў познаньскай Galeria Curators’LAB адкрываецца выстава беларускай мастачкі і фатографкі Вольгі Савіч. У сваім праекце «Gene BY» аўтарка даследуе ідэнтычнасць беларусаў у актуальных варунках пагрозы вялікіх катастроф.
Вольга Савіч займаецца так званай творчай і канцэптуальнай фатаграфіяй. У «Gene BY» яна выкарыстоўвае адмысловую мастацкую тэхніку paper transfer print, каб стварыць шматзначнае поле для свайго паслання. Аб’яднаўшы традыцыйны беларускі арнамент і фатаграфіі з інтэрнэту, мастачка стварае кампазіцыі, у якіх сутыкаюцца два культурныя коды: традыцыйнай культуры — зашыфраванае пасланне ў арнаменце, і (пост)мадэрнісцкай, амаль лічбавай культуры — калі фатаграфія прапаноўвае не адбіткі дакладных людзей, а ўмоўныя вобразы. Спалучэнне, нават сутыкненне гэтых кодаў нараджае пэўны сэнсавы парадокс, які правакуе на пытанні.
«На выявах бачым людзей без твараў — гэта тыповая рыса для анлайн-пляцовак, дзе ажыццяўляецца купля-продаж. Першапачатковая функцыя такіх выяў пераасэнсоўваецца: Вольга Савіч засяроджваецца не на тавары, а на ананімных людзях. Гэта становіцца адпраўным пунктам для разважанняў пра сучасную ідэнтычнасць беларусаў», — распавядае пра праект Вольгі Савіч яго куратарка, польская мастацтвазнаўца, арт-менеджарка Эвеліна Мурашкевіч (Ewelina Muraszkiewicz).
Як змянілася самаўспрыманне беларусаў на фоне палітычных рэпрэсій, пагрозы вайны і пастаяннага страху? Як яны бачаць сябе ў эміграцыі, а як – тыя, хто застаўся ў краіне? Як гэта ўсё паўплывае на нацыянальную самасвядомасць у будучыні? І што дае зварот да традыцыі ў кантэксце перамен? — праект Вольгі Савіч прапануе паразважаць над гэтым.
Вольга Савіч — беларуская мастачка і фатографка з Мінска. Па адукацыі культуролаг (Вольга скончыла БДУ культуры і мастацтва), яна атрымала спецыяльную фатаграфічную адукацыю на курсах Генадзя Родзікава і Уладзіміра Парфянка (Беларусь), Катарыны Сівердынг (Германія) і Элізабэт Шмірль (Аўстрыя). Пераможца ў намінацыі «Эксперыментальная фатаграфія» (2015, The Baltic Photo Biennale, Калінінград, Расія) і ўладальнік Гран-пры ў намінацыі «Мастацкая фатаграфія» конкурсу «Прафота» (2017, Конкурс Project Photography, Мінск, Беларусь). Фотаздымкі Вольгі ўдзельнічалі ў выставах у Беларусі, Аўстрыі, Францыі, Грузіі, Літве, Латвіі, Германіі.
Выстава будзе працаваць у познаньскай Galeria Curators’LAB да 20 красавіка.
Падпісвайцеся на культурныя навіны Reform.news у Telegram