Беларускі барытон Ілья Сільчукоў, вымушаны пакінуць радзіму праз сваю грамадзянскую пазіцыю, працягвае паспяховую кар’еру на сусветных падмостках. У новым сезоне спявак далучаецца да амерыканскай Boston Lyric Opera, дзе дэбютуе ў оперы Джакіна Расіні «Вільгельм Тэль» — знакавым творы пра супраціў і барацьбу за свабоду.
Сімвалы супраціву: на сцэне і ў жыцці
Сімвалічна, што дэбют беларускага спевака ў Бостане адбудзецца менавіта ў гэтым творы. Гранд-опера Джакіна Расіні «Вільгельм Тэль» — гэта эпічнае палатно пра супраціў, барацьбу за свабоду і трыумф аб’яднанага народа над тыраніяй. У цэнтры сюжэту — легендарны лучнік, які выклікаў на бой самаўладдзе. Boston Lyric Opera вяртае гэты твор на бостанскую сцэну ў выглядзе паўнавартаснай пастаноўкі ўпершыню больш чым за 150 гадоў.
Згодна з лібрэта, герой Іллі Сільчукова — пастух Лёйтгольд — становіцца галоўным дэтанатарам сюжэту. Уцякаючы ад прыгнятальнікаў за тое, што абараніў сваю дачку ад гвалту імперскага афіцэра, ён звяртаецца па дапамогу да Вільгельма Тэля. Спагада і ратаванне Лёйтгольда прабуджаюць народ і запускаюць хвалю паўстання супраць тыраніі — сімвалічны вобраз чалавека, які не змог трываць беззаконне і стаў на шлях барацьбы.
Зорны склад і пастаноўка
Пастаноўку стварае каманда сусветнага ўзроўню.
Музычны кіраўнік і дырыжор — брытанскі маэстра Дэйвід Энгус (David Angus) — музычны дырэктар BLO, які кіруе вядомымі аркестрамі па ўсім свеце (у тым ліку Лонданскім філарманічным).
Рэжысёры-пастаноўшчыкі — выбітны дуэт Віта Цыкун (Vita Tzykun) і Дэйвід Адам Мур (David Adam Moore). Віта Цыкун — вядомая міжнародная арт-дырэктарка і дызайнерка, якая працавала з Lyric Opera of Chicago, а таксама стварала візуальныя праекты для Lady Gaga). Дэйвід Адам Мур — зорны барытон і рэжысёр, які выступае на сцэнах Метропалітэн-оперы, Ла Скала і Ковент-Гардэн.
Разам з Ільём Сільчуковым на сцэну выйдзе міжнародны склад салістаў: грузінскі барытон Георгі Гагнідзэ (George Gagnidze) у ролі Вільгельма Тэля, Аня Матанавіч (Anya Matanovič) у ролі Матыльды, Кану Кім (Konu Kim) ў ролі Арнольда і іншыя артысты.
Шлях Іллі Сільчукова
Нагадаем, што яшчэ некалькі гадоў таму Ілья Сільчукоў быў адным з галоўных і найбольш любімых публікай барытонаў беларускай оперы, лаўрэатам трох спецыяльных фондаў прэзідэнта па падтрымцы таленавітай моладзі і пераможцам больш чым 15 міжнародных конкурсаў.
У 2020 годзе, пасля сфальсіфікаваных прэзідэнцкіх выбараў і пачатку гвалту супраць мірных пратэстоўцаў, Сільчукоў адкрыта падтрымаў беларусаў. Ён запісаў відэазварот супраць гвалту, а затым выканаў знакаміты гімн «Магутны Божа», які стаў адным з сімвалаў беларускага супраціву. За сваю грамадзянскую пазіцыю спявак быў звольнены з Опернага тэатра Беларусі.
Апынуўшыся ў эміграцыі, беларускі барытон фактычна перазапусціў сваю кар’еру з нуля ў высокаканкурэнтнай заходняй індустрыі. Праз высілкі і прафесіяналізм Сільчукоў крок за крокам вяртае сабе сусветную сцэну: у чэрвені 2023 года ён дэбютаваў у славутым міланскім тэатры La Scala, а сёння актыўна заваёўвае амерыканскія падмосткі (Seattle Opera, Boston Lyric Opera). Спалучэнне першакласнай вакальнай школы і выключнай трываласці дазваляе беларускаму артысту будаваць міжнародную будучыню, нягледзячы на ўсе выпрабаванні. Сёння ў яго працоўным графіку — выступы на оперных сцэнах свету: у Варшаве, Рыме, Франкфурце, Тэль-Авіве, Софіі, а цяпер — у Boston Lyric Opera.
Час і месца будучай прэм’еры: 25 верасня (19:30), Emerson Colonial Theatre (106 Boylston Street, Boston, MA 02116).
Опера выконваецца на французскай мове з англійскімі субтытрамі.
Падрабязней пра пастаноўку тут.
Падпісвайцеся на культурныя навіны Reform.news у Telegram
