Фото: twitter.com/skodaautonews
Забарону на тавары Škoda, Nivea і Liqui Moly падоўжылі да канца 2027 года. Гэта прадугледжана пастановай Савета Міністраў №782 ад 29 снежня, якая сёння апублікаваная на Нацыянальным прававым інтэрнэт-партале.
Забарона была ўведзена ў красавіку 2021 года. Да гэтага тры кампаніі адмовіліся спансіраваць Чэмпіянат свету па хакеі, калі ён пройдзе ў Беларусі. У выніку Мінск быў пазбаўлены права прымаць чэмпіянат. У адказ урад забараніў увоз і рэалізацыю тавараў кампаній па ўказанні Аляксандра Лукашэнкі. Пасля гэтага абмежаванне некалькі разоў падаўжалася. Апошні раз забарона падаўжалася да канца 2025 года.
Нагадаем, забаронена ўвозіць і прадаваць тавары Škoda, Liqui Moly і Beiersdorf (гандлёвыя маркі «Nivea», «Eucerin», «La Prairie», «Labello», «Hansaplast», «Florena», «8X4», «Skin Stories», «Gammon», «Tesa», «Chaul», «Coppertone», «Hidrofugal», «Stop The Water While Using Me»).