Нацбанк абавязаў банкі накіроўваць частку прыбытку на крэдытаванне інвестпраектаў

Беларускія банкі павінны будуць ствараць фонды за кошт свайго прыбытку, сродкі з якіх будуць накіроўвацца на крэдытаванне інвестыцыйных праектаў. Гэта прадугледжана пастановай праўлення Нацбанка №369 ад 20 снежня, якая сёння апублікаваная на Нацыянальным прававым інтэрнэт-партале і ўступае ў сілу з 1 студзеня.

У адпаведнасці з ім, банкі і НКФА павінны ствараць фонды (за выключэннем рэзервовага фонду) за кошт прыбытку, які застаецца ў іх распараджэнні пасля выплаты падаткаў, збораў (пошлін), іншых абавязковых плацяжоў у бюджэты, у тым ліку ў дзяржаўныя мэтавыя бюджэтныя фонды, а таксама ў дзяржаўныя пазабюджэтныя фонды.

Сродкі гэтых фондаў будуць выкарыстоўвацца ў наступных прапорцыях:

• не менш за 60% — для крэдытавання інвестыцыйных праектаў і інвеставання ў эканоміку з дапамогай іншых формаў і спосабаў, у тым ліку шляхам павелічэння статутных фондаў банкаў;
• не больш за 40% — на павелічэнне рэзервовага фонду і (або) іншыя мэты, вызначаныя агульным сходам акцыянераў банка.

Пастанова таксама ўтрымлівае пункт з грыфам «для службовага карыстання».