Александр Лукашенко. Фото: president.gov.by
Аляксандр Лукашэнка даручыў правесці неабходныя работы ў пойме Прыпяці і распрацаваць для гэтага спецыяльную тэхніку. Пра гэта ён заявіў 15 жніўня на фестывалі «Зов Полесья».
Паводле слоў Лукашэнкі, пойма Прыпяці ўяўляе вялікую каштоўнасць, але на значнай тэрыторыі абводненых зямель назіраецца зарастанне. Ён лічыць, што пойменныя тэрыторыі неабходна рэгулярна касіць і расчышчаць ад кустоўю.
«Учора мы вельмі шмат гаварылі пра тое, што рабіць з поймай. Я часта туды-сюды лятаю ўздоўж Прыпяці і ўпоперак. Гэта амаль 10 кіламетраў, 10 кіламетраў абводненых зямель [зарастаюць]. Недапушчальнае марнатраўства для нас, калі ў свеце мільёны людзей галадаюць. Я выдатна разумею, як зямны чалавек, што гэтая пойма — наша будучыня. І не толькі беларусаў, можа быць, усёй Еўропы. Клімат становіцца ўсё больш сухім і гарачым, а ў нас такое багацце.
Таму ўчора і кіраўнікі, і людзі ад зямлі, і наш фермер правільна сказалі — пойму трэба касіць. Нават калі не зможам нарыхтаваць сена, як вы тут малайцы, прыгожа зрабілі, трэба яе касіць. Бо, як яны кажуць, будуць джунглі, у якія ніколі нашы дзеці нават не дабяруцца», — заявіў Лукашэнка.
Ён адзначыў, што для догляду за поймай спатрэбіцца спецыяльная тэхніка. Магутныя энерганасычаныя трактары для такіх работ не падыходзяць, а людзей для ручной працы ў неабходнай колькасці ўжо няма.
«Учора было даручана стварыць сродкі малой механізацыі, назавём іх так, для таго, каб касіць гэтыя поймы. Ужо так касіць, як я калісьці з вамі касіў (…). Мы на пароме пераправіліся праз гэтую Прыпяць і касілі косамі траву. У нас ужо столькі людзей няма і ніколі не будзе. Патрэбна тэхніка. Але магутныя энерганасычаныя трактары не падыходзяць для таго, каб вычышчаць пойму, высякаць кустоўе і вырошчваць там траву. Патрэбна спецыяльная тэхніка», — падкрэсліў ён.
Лукашэнка даручыў прадугледзець у праграме развіцця раёнаў Прыпяцкага Палесся на 2025–2030 гады сродкі на стварэнне такой тэхнікі. Ён заявіў, што пры неабходнасці дадатковае фінансаванне будзе прадугледжана з бюджэту.
«Таму, Міхаіл Іванавіч [Русы, старшыня Пастаяннай камісіі Савета Рэспублікі Нацыянальнага сходу па заканадаўстве і дзяржаўным будаўніцтве, куратар Праграмы развіцця раёнаў Прыпяцкага Палесся на 2025–2030 гады], трэба і ў нашай праграме прадугледзець нейкія невялікія сродкі на гэтую тэхніку. Мы ў бюджэце дадамо грошай, але трэба стварыць гэтую тэхніку, бо мы тут пабудуем добрыя пасёлкі, малочна-таварныя комплексы — ты гэта выдатна разумееш. А людзей мала, тэхнікі няма, і людзі, як раней, будуць гарбаціцца на гэтых фермах. Трэба зрабіць жыццё годным для людзей», — заявіў ён.
«Будзем канцэнтравацца, каб вы разумелі, у аграгарадках, гэта вельмі важна для Палесся. У буйных вёсках. Людзі ўжо не хочуць жыць на балоце і на хутарах. Яны думаюць пра дзяцей. Дзецям трэба даць адукацыю, дзеці павінны быць усім забяспечаныя. А гэта магчыма толькі ў буйных, вось такіх, як Ляскавічы, аграгарадках, дзе павінна быць усё, як у горадзе. І тады людзі не будуць імкнуцца ўцячы адсюль. Хоць я б так і не сказаў, пакуль Бог тут з вамі і людзі адсюль не ўцякаюць ні ў Мінск, ні ў іншыя буйныя гарады. Але трэба думаць пра будучыню. І другая Праграма адраджэння Палесся павінна закласці хаця б асновы для будучага развіцця ў такім напрамку гэтага рэгіёна, як і ўсёй Беларусі», — заявіў Лукашэнка.