Урад Беларусі будзе кампенсаваць транспартныя выдаткі экспарцёрам харчовай прадукцыі

У Беларусі экспарцёры харчовай прадукцыі змогуць атрымліваць кампенсацыю часткі транспартна-лагістычных выдаткаў пры экспарце ў краіны «далёкай дугі». Адпаведную пастанову падпісаў прэм’ер-міністр Аляксандр Турчын, паведамілі ў прэс-службе ўрада.

«Дакументам прадугледжваецца рэалізацыя пілотнага праекта па частковай кампенсацыі вытворцам прадукцыі ў 2027 годзе транспартна-лагістычных выдаткаў пры экспарце ў другім паўгоддзі 2026 года харчовай прадукцыі ў краіны „далёкай дугі“ ў адпаведнасці з пералікамі такой прадукцыі і замежных дзяржаў», — расказалі ў прэс-службе.

Памер кампенсацыі складзе:

• для сметанковага масла, сыроў, дзіцячага харчавання — 50% выдаткаў;
• для мяса птушкі, сухога малака і сухой сыроваткі — 30% выдаткаў.

Для атрымання кампенсацыі трэба будзе выканаць пэўныя ўмовы, у тым ліку павялічыць фізічныя аб’ёмы экспарту ў замежную дзяржаву на 10%.

У прэс-службе ўрада не раскрылі, якія краіны ўключаны ў пералік дзяржаў, пры экспарце ў якія будзе аказвацца падтрымка. Само паняцце «далёкай дугі» з’яўляецца размытым. Часта пад ім маюцца на ўвазе ўсе краіны, якія не ўваходзяць у СНД.