Урад абнавіў тарыфы на рыелтарскія паслугі

Савет міністраў Беларусі пастановай №157 ад 2 красавіка абнавіў некаторыя гранічныя максімальныя тарыфы на рыелтарскія паслугі, якія аказваюцца фізічным асобам. Дакумент сёння апублікаваны на Нацыянальным прававым інтэрнэт-партале і ўступае ў сілу з 16 мая.

Змены закранулі тарыфы на рыелтарскія паслугі па садзейнічанні ў продажы аб’ектаў нерухомай маёмасці, якія ўсталёўваюцца ў працэнце ад кошту аб’екта. Калі раней быў усталяваны адзіны тарыф на аб’екты коштам да 4200 БВ у 3%, то цяпер з’явілася градацыя.

Гранічныя максімальныя тарыфы складаюць пры кошце аб’екта:

• да 700 БВ уключна – 6%,
• звыш 700 да 2000 БВ уключна – 5%,
• звыш 2000 да 3000 БВ уключна – 4%,
• звыш 3000 да 4200 БВ уключна – 3%.

Акрамя таго, раней была градацыя тарыфаў на аб’екты коштам звыш 12 400 БВ. Цяпер жа ад яе адмовіліся. Для такіх аб’ектаў усталяваны тарыф у 1,5% ад кошту нерухомасці.