Скриншот эфира
У Беларусі не збіраюцца абмяжоўваць узрост карыстальнікаў сацыяльных сетак. Пра гэта заявіў намеснік кіраўніка адміністрацыі Лукашэнкі Уладзімір Пярцоў. Паводле яго слоў, у краіне і няма такіх механізмаў.
На палях калегіі Мінінфарма ў Пярцова спыталі, ці трэба блакіраваць сацыяльныя сеткі для непаўналетніх. Падобныя абмежаванні цяпер прымаюцца ў шэрагу краін.
“Па-першае, не блакіраваць сацыяльныя сеткі для дзяцей 15-16 гадоў, а ўводзіць узроставыя абмежаванні і іншыя цэнзы, якія ўжо заканадаўча прыняты ў тым ліку і ў суседніх краінах. З улікам таго, што сацсеткі ўсё больш пачынаюць уплываць на маладое пакаленне, якое з даросленнем не набывае вопыт чытання папяровых газет і застаецца верным сваім лічбавым пляцоўкам, праз якія нам дастаткова эфектыўна ўдаецца прасоўваць сваю праўду ў дачыненні да краіны.
Дзяржаўныя адміністрацыі краін прадпрымаюць меры, якія абмяжоўваюць сацсеткі для дзяцей да пэўнага ўзросту пад падставай іх падступных алгарытмаў, псіхічнага ўздзеяння, дапушчаючы парог уваходжання ўжо ў больш-менш свядомым узросце. Прымаць рэгуляцыйныя рашэнні ў дачыненні да абмежаванняў па ўзросце або нейкіх яшчэ параметрах мы пакуль не збіраемся”, – адказаў ён.
Паводле слоў Пярцова, алгарытм пацвярджэння ўзросту маладымі людзьмі складаны. Няма гарантыі, што ў акаўнт заходзіць менавіта той чалавек, які заяўлены.
“Няма гарантыі, які менавіта карыстальнік у дадзены момант уваходзіць пад тым ці іншым нікам у сацыяльную сетку. Пры гэтым мы ведаем, што праз гульнявыя платформы, сацсеткі замахі на нашу моладзь ужо ёсць.
Гэтыя сацыяльныя сеткі пачынаюць збор персанальных даных, прымушаюць маладога чалавека, часцяком дзіця, прад’явіць скан або фота свайго пашпарта ці іншага дакумента, каб усю лічбавую праўду пра гэтага персанажа сабраць у адзіным пэўным банку захоўвання для разумення, хто і пад якім нікам уваходзіць, якія рэсурсы наведвае, у што гуляе, што гугліць, перасылае. Мы гэта бачым, назіраем, пакуль робім толькі папярэднія высновы.
Бачым, што адбываецца з Telegram, TikTok, як гаснуць некаторыя звыклыя дамінуючыя сацыяльныя сеткі, як адбываюцца істотныя змены ў медыяланшафтах. Да чаго гэта прывядзе, як нам у гэта ўбудоўвацца, пакуль адкрытае пытанне для органаў рэгулятара”, – дадаў ён.