Сямейную пару прыгаварылі да 24 і 21 года калоніі па абвінавачанні ў «тэрарызме»

Рэдакцыя Reform.news · 13 студзеня 2026, 17:24

https://reform.news/be/sjamejnuju-paru-prygavaryli-da-24-i-21-goda-kalonii-pa-abvinavachanni-tjeraryzme/

Дзмітрый і Вольга Капузы з Драгічынскага раёна атрымалі 24 і 21 год пазбаўлення волі адпаведна па абвінавачанні ў «акце тэрарызму» і «незаконных дзеяннях з боепрыпасамі», паведамляе праваабарончы цэнтр «Вясна».

36-гадовых Дзмітрыя і Вольгу затрымалі 16 студзеня 2024 года. Пасля затрымання на дзяржаўным тэлебачанні паказалі ролік «Зачыстка. Барацьба з дыверсантамі і агентамі спецслужбаў Украіны ў Беларусі», у якім прапагандысты заявілі, што пара нібыта працавала на ўкраінскія спецслужбы. Усяго тады было затрымана 12 чалавек. Сцвярджалася, што яны нібыта забіралі выбухоўку і рабілі схованкі на тэрыторыі Беларусі. Пры затрыманні ў Дзмітрыя стралялі і паранілі ў сцягно.

Суд праходзіў у закрытым рэжыме. Акрамя тэрмінаў пазбаўлення волі Дзмітрый і Вольга атрымалі буйныя штрафы. Улетку 2025 года іх унеслі ў «спіс тэрарыстаў».