МУС праводзіць камандна-штабныя вучэнні ў Віцебску, на якіх адпрацоўваюцца дзеянні органаў унутраных спраў і ўнутраных войскаў «у асаблівых умовах».
На вучэннях прысутнічаў міністр унутраных спраў Іван Кубракоў. Першы этап з тэарэтычнай прапрацоўкай захавання грамадскай бяспекі Кубракаву не спадабаўся. Ён рэзка раскрытыкаваў вучэнні, прыняў шэраг кадравых рашэнняў і загадаў правесці навучальны семінар, паведамляе прэс-служба МУС.
На другім этапе на практыцы адпрацоўваліся некалькі сцэнарыяў: пошук і затрыманне каардынатараў пратэстаў, спыненне масавых беспарадкаў, эвакуацыя пацярпелых падчас стыхійнага бедства, блакіроўка дарог, вызваленне закладнікаў.
Частка сілавікоў выконвала ролю пратэстоўцаў. Для большай дакладнасці ім уручылі белыя і сінія сцягі. Пасля “затрымання” частку “пратэстоўцаў” паставілі на калені з рукамі за спінай, а частку — ля плота на расцяжку.
