Саўмін падоўжыў забарону на маркіроўку імпартаванай алкагольнай прадукцыі ў «недружалюбных краінах»

Савет міністраў Беларусі пастановай №54 ад 30 студзеня падоўжыў забарону імпарту паслуг па маркіроўцы акцызнымі маркамі алкагольных напояў, якія аказваюцца юрыдычнымі і фізічнымі асобамі дзяржаў, што здзяйсняюць недружалюбныя дзеянні, на тэрыторыі такіх дзяржаў. Дакумент сёння апублікаваны на Нацыянальным прававым інтэрнэт-партале.

Мытныя органы ўпаўнаважаныя на забеспячэнне і кантроль захавання забароны. Яна будзе дзейнічаць да 31 снежня 2027 года ўключна.

Першапачаткова забарона была ўведзена ў 2022 годзе. Затым яе падаўжалі. Апошняе падаўжэнне дзейнічала да канца 2025 года.

Пастановай таксама зацверджаны пералік «недружалюбных» краін для яе рэалізацыі:

1. Аўстралійскі Саюз.
2. Дзяржавы — члены Еўрапейскага саюза.
3. Канада.
4. Княства Ліхтэнштэйн.
5. Каралеўства Нарвегія.
6. Новая Зеландыя.
7. Рэспубліка Албанія.
8. Рэспубліка Ісландыя.
9. Рэспубліка Паўночная Македонія.
10. Злучанае Каралеўства Вялікабрытаніі і Паўночнай Ірландыі.
11. Злучаныя Штаты Амерыкі.
12. Чарнагорыя.
13. Швейцарская Канфедэрацыя.