Рыжанкоў услед за Лукашэнкам скардзіўся гендырэктару ФАО на калійныя санкцыі

Рэдакцыя Reform.news · 2 чэрвеня 2026, 13:52

https://reform.news/be/ryzhanko-usled-za-lukashjenkam-skardzi-sja-gendyrjektaru-fao-na-kalijnyja-sankcyi/

Міністр замежных спраў Беларусі Максім Рыжанкоў сустрэўся з гендырэктарам Харчовай і сельскагаспадарчай арганізацыі Аб’яднаных Нацый (ФАО) Цюй Дун’юем.

“Асаблівая ўвага падчас перамоў была нададзена пытанню санкцыйных абмежаванняў у дачыненні да экспарту беларускіх калійных угнаенняў”, — гаворыцца ў паведамленні МЗС па выніках сустрэчы.

Учора тэму санкцый на сустрэчы з кітайскім чыноўнікам з ААН уздымаў і Аляксандр Лукашэнка.

Таксама падчас сённяшняй сустрэчы абмяркоўвалася супрацоўніцтва Беларусі і ФАО. Рыжанкоў падкрэсліў важнасць узаемадзеяння з ФАО, якая аказвае экспертную падтрымку Беларусі ў сферах сельскай, лясной і рыбнай гаспадаркі, аховы навакольнага асяроддзя. Ён спадзяецца на найхутчэйшае ўзгадненне краінавай праграмы супрацоўніцтва да 2030 года.

Міністр таксама пазнаёміў госця з праграмамі супрацоўніцтва Беларусі з краінамі Азіі і Афрыкі. Ён выказаў зацікаўленасць у далучэнні да праектаў і праграм ФАО для дзяржаў з гэтых рэгіёнаў.