Иллюстративное фото: e-osago.ru
Расійскія аўтаўладальнікі заключылі больш за 3 тысячы дамоваў АСАГА з пашырэннем дзеяння на тэрыторыю Беларусі з моманту запуску прадукту вясной 2025 года. Пра гэта паведаміў у інтэрв’ю ТАСС кіраўнік Усерасійскага саюза страхоўшчыкаў Яўгеній Уфімцаў.
Пашырэнне страхавога пакрыцця на Беларусь («Белая карта») стала даступным расійскім вадзіцелям з 23 красавіка 2025 года. Аднак, як адзначаюць ва УСС, попыт на такія полісы з боку расійскіх вадзіцеляў пакуль застаецца ўмераным.
«Мы ўбачылі, што ў Расіі пакуль параўнальна не так шмат аўтаўладальнікаў скарысталіся гэтым пашырэннем: такіх дамоваў заключана крыху больш за 3 тысячы штук. А з боку Рэспублікі Беларусь у разы большая колькасць тых, хто набыў такое пашырэнне, — там прыкладна 75 тысяч штук», — адзначыў ён.
Розніцу ў паказчыках ён звязвае з механізмам продажаў: у Расіі «Белая карта» даступная толькі пры падаўжэнні гадавога АСАГА, тады як у Беларусі яе можна набыць асобна.
Для разавых паездак расіяне таксама набываюць на кароткія тэрміны так званыя сінія карты. Аб’ём іх продажаў у 2025 годзе, як чакаецца, перавысіць 500 тысяч полісаў, што вышэй за ўзровень папярэдняга года.
Страхоўшчыкі абмяркоўваюць магчымасць пашырэння геаграфіі «Сіняй карты» на Казахстан, Кыргызстан, Манголію, Азербайджан, Узбекістан, Турцыю, Іран і Кітай. Паводле слоў кіраўніка УСС, патэнцыйныя ўдзельнікі праекта хацелі б спачатку ацаніць вынікі ўзаемадзеяння з Беларуссю. Рашэнні аб новых пагадненнях могуць быць прынятыя ў 2026 годзе, найперш у рамках Еўразійскага эканамічнага саюза.