Расія нанесла масіраваны ўдар па Украіне. Балістычная ракета трапіла ў жылы дом

Рэдакцыя Reform.news · 30 ліпеня 2026, 07:26

https://reform.news/be/rasija-nanesla-masiravany-dar-pa-ukraine-balistychnaja-raketa-trapila-zhyly-dom/

Сёння ноччу Расія нанесла чарговы масіраваны ўдар па Украіне. Прымяняліся балістычныя ракеты і беспілотнікі. Пад ударам былі Кіеў, Дняпро, Крывы Рог, Вінніца, Львоў.

У Кіеве на раніцу вядома пра гібель аднаго чалавека. Два чалавекі пацярпелі. У горадзе гарэлі гандлёвыя павільёны, гаражны кааператыў, пяціпавярховы жылы дом.

У Кіеўскай вобласці налічваецца пяць пацярпелых. Часткова разбураны прыватны жылы дом. З-пад завалаў дасталі пецярых пацярпелых.

У Палтаўскім раёне загінуў адзін чалавек.

Пад Крывым Рогам балістычная ракета «Іскандэр-М», выпушчаная з Варонежа, трапіла проста ў прыватны дом. У выніку ўдару загінулі шэсць чалавек — сярод іх дзяўчынкі 5 і 12 гадоў. Яшчэ восем чалавек атрымалі раненні, у тым ліку двое дзяцей. Пошукавая аперацыя на месцы яшчэ працягваецца.

У Львове пашкоджаныя два жылыя дамы. Налічваецца 15 пацярпелых. Выратавальная аперацыя яшчэ працягваецца.

Польшча з-за выкарыстання Расіяй дальнабойных сродкаў па заходніх абласцях Украіны падымала ў паветра знішчальнікі і павышала гатоўнасць СПА. У Люблінскім ваяводстве спрацавалі сірэны паветранай трывогі. Яны былі запушчаныя з-за небяспекі ў сувязі з ударамі РФ па прыгранічных рэгіёнах Украіны.