Расія працягвае нарошчваць ціск на Арменію перад парламенцкімі выбарамі. Рассельгаснагляд прыняў рашэнне з 30 мая абмежаваць увоз з Арменіі свежых таматаў, агуркоў, перцаў, зеляніны і клубніц да выпрацоўкі адпаведнага алгарытму па забеспячэнні бяспекі адгружанай прадукцыі. Гаворка ідзе як пра прадукцыю, што паходзіць з Арменіі, так і пра тую, што паступае з яе.
Рассельгаснагляд аргументаваў сваё рашэнне пачашчэннем выпадкаў парушэнняў пры пастаўках армянскай плодаагародніннай прадукцыі.
Раней РФ ужо абмежавала ўвоз з Арменіі кветак, мінеральнай вады «Джэрмук», а таксама каньяку і вінаў ад трох армянскіх вытворцаў.
Учора стала вядома пра ліст міністра энергетыкі РФ Сяргея Цывілёва, у якім ён папярэджваў Ерэван пра гатоўнасць разарваць пагадненне па пастаўках газу, нафтапрадуктаў і алмазаў у выпадку ўступлення Арменіі ў Еўрасаюз.