Праваабарончы цэнтр «Вясна» паведаміў, што ў Беларусі за грашовыя пераводы ў фонды салідарнасці і іншыя ініцыятывы, прызнаныя ўладамі «экстрэмісцкімі» і «тэрарыстычнымі», асудзілі мінімум 159 чалавек. Паводле даных праваабаронцаў, сярод іх 26 IT-спецыялістаў і 33 жанчыны.
За ахвяраванні ў падтрымку Украіны асудзілі 44 чалавекі. 46 палітычных зняволеных, асуджаных за данаты, былі памілаваныя, аднак сотні беларусаў пад пагрозай крымінальных спраў былі вымушаныя адкупляцца непрацэсуальнымі ахвяраваннямі ў шматразовым памеры.
Сярод нядаўніх прысудаў — справа IT-спецыяліста Паўла Каберды, асуджанага на 5 гадоў калоніі і штраф за каля дзесяці данатаў на суму ад 10 да 50 еўра ў фонды BYSOL, BY_help, BYPOL. На пачатку мая 5 гадоў калоніі атрымаў Дзмітрый Новікаў. Падставай сталі два невялікія пераводы ў крыптавалюце на гуманітарныя патрэбы беларускіх добраахвотнікаў у складзе УСУ. У той жа калоніі №22 адбывае пяцігадовы тэрмін Дзмітрый Касенка, асуджаны ў 2025 годзе за данат.
Максімальныя тэрміны за данаты склалі 9 гадоў. Іх атрымалі 5 чалавек, уключаючы айцішніка Аляксандра Зіязетдзінава, уладальніка крамы адзення Артура Роліча, IT-спецыяліста Кірыла Крошкіна, 25-гадовага Уладзіміра Лазарэвіча і супрацоўніцу 6-й бальніцы Мінска Ірыну Рашкевіч. Зіязетдзінава спачатку прысудзілі да трох гадоў за перавод 0,2 эфіра на крыптагаманец BYPOL, але пазней дадалі абвінавачанне ў фінансаванні тэрарызму і давялі тэрмін да дзевяці гадоў.
Рэкордныя 9,5 года калоніі атрымаў трэнер-масажыст Мікалай Васілевіч. Яго судзілі двойчы, у агульнай складанасці інкрымінаваўшы 54 данаты ў розныя фонды.
Сярод жанчын, асуджаных за данаты, — Ксенія Хадырава (5 гадоў), Аліна Хмялеўская (5,5 года) і IT-спецыялістка з EPAM Марына Леановіч (5 гадоў). У Леановіч маецца псіхіятрычны дыягназ, што асабліва ўскладняе яе знаходжанне ў калоніі. Усяго ў Беларусі за данаты асудзілі 33 жанчыны. Цяпер у зняволенні застаюцца 9 з іх.