Пракуратура Мінска выдала 34 прадпісанні аб канфіскацыі з продажу «экстрэмісцкіх» кніг у 2025 годзе

Рэдакцыя Reform.news · 18 лютага 2026, 18:05

https://reform.news/be/prakuratura-minska-vydala-34-pradpisanni-ab-kanfiskacyi-z-prodazhu-jekstrjemisckih-knig-u-2025-godze/

У 2025 годзе органы пракуратуры Мінска выдалі 34 прадпісанні, якія датычацца продажу прызнаных «экстрэмісцкімі» кніг.

Яшчэ некалькі прадпісанняў было выдадзена з пачатку 2026 года. Пракуратура Савецкага раёна Мінска знайшла ў адным з інтэрнэт-магазінаў кнігі Гейнца Гудэрыяна «Успаміны нямецкага генерала. Танкавыя войскі Германіі ў Другой сусветнай вайне 1939-1945».

Пракуратура Заводскага раёна Мінска выявіла, што індывідуальны прадпрымальнік прадаваў на сайце кнігі Майка Омера «Унутры забойцы» і «Жыўцом у цемры», якія былі забаронены ў Беларусі.

Таксама ІП прадаваў кнігі Райнера Цітэльмана «Гітлер. Светапогляд рэвалюцыянера», Вільгельма фон Лееба і Франца Гальдэра «Ленінградскі «Бліцкрыг» 1941-1942», унесеныя ў спіс «экстрэмісцкіх матэрыялаў».

Па патрабаванні пракурораў усе друкаваныя выданні былі выключаны з продажу, паведамляе пракуратура Мінска.