Фото: Straż Graniczna
Польскія памежнікі выявілі новы тунэль на мяжы з Беларуссю. Як паведамілі ў Падляшскім аддзеле Памежнай аховы, падкоп быў знойдзены недалёка ад Нарэўкі.
Тунэль мае даўжыню некалькі дзясяткаў метраў. Ён праходзіць як пад памежным плотам, так і пад тэхнічнай дарогай. Вышыня падземнага ходу каля 1,5 метра. Уваход у яго знаходзіўся ў лесе, прыкладна ў 50 метрах ад мяжы з беларускага боку, а выхад — на польскім баку прыкладна ў 10 метрах ад загароджы.
“Дзякуючы электронным сістэмам супрацоўнікі Памежнай аховы хутка высветлілі, што за кароткі прамежак часу праз тунэль у Польшчу пранікла больш за 180 замежнікаў. У выніку прынятых мер на дадзены момант затрымана больш за 130 чалавек, пошукі астатніх парушальнікаў працягваюцца. Акрамя памежнікаў, у аперацыі ўдзельнічаюць салдаты і паліцэйскія, таксама выкарыстоўваюцца службовыя сабакі. Сярод затрыманых замежнікаў былі ў асноўным грамадзяне Афганістана і Пакістана, астатнія — у тым ліку грамадзяне Індыі, Непала і Бангладэш”, — гаворыцца ў паведамленні.
Таксама затрыманыя двое грамадзян Польшчы і Літвы, якія прыехалі па мігрантаў.