Пецярым каліноўцам вынеслі прысуды ад 12 да 25 гадоў калоніі

Рэдакцыя Reform.news · 9 сакавіка 2026, 13:39

https://reform.news/be/pecjarym-kalino-cam-vynesli-prysudy-ad-12-da-25-gado-kalonii/

Праваабарончаму цэнтру “Вясна” стаў вядомы прысуд па справе пяці байцоў палка Каліноўскага. Завочны працэс над Аляксеем Кавальчуком, Аляксеем Назаравым, Дзянісам Прохаравым, Паўлам Шурмеем і Вадзімам Кабанчуком пачаўся 28 студзеня. 5 сакавіка ім быў вынесены прысуд.

Як паведамляе “Вясна”, былому камандзіру Дзянісу Прохараву прызначана пакаранне ў 25 гадоў калоніі ўзмоцненага рэжыму. Пры гэтым першыя пяць гадоў ён павінен адбываць у турме. Яму таксама прызначаны штраф у 700 базавых велічынь.

Былому камандзіру Паўлу Шурмею таксама прызначана пакаранне ў выглядзе 25 гадоў пазбаўлення волі ва ўмовах узмоцненага рэжыму з адбываннем першых пяці гадоў у турме. Памер штрафу для яго — 2000 базавых велічынь.

Былому намесніку камандзіра, прадстаўніку АПК па абароне Вадзіму Кабанчуку прызначана пакаранне ў 25 гадоў калоніі ўзмоцненага рэжыму з адбываннем першых пяці гадоў у турме і штраф у 700 базавых велічынь. Таксама Кабанчук пазбаўлены вайсковага звання старшы лейтэнант запасу.

Інструктару Аляксею Назараву прызначана пакаранне ў 12 гадоў калоніі ва ўмовах узмоцненага рэжыму і штраф у 700 базавых велічынь.

Байцу Аляксею Кавальчуку прызначылі 12 гадоў пазбаўлення волі ў калоніі ўзмоцненага рэжыму са штрафам у 500 БВ.