Палітвязень Вячаслаў Арэшка цалкам аслеп у калоніі – «Радыё Свабода»

Рэдакцыя Reform.news · 8 кастрычніка 2026, 15:21

https://reform.news/be/palitvjazen-vjachasla-arjeshka-calkam-aslep-u-kalonii-radyjo-svaboda/

71-гадовы палітвязень, актывіст незалежнага прафсаюза РЭП Вячаслаў Арэшка цалкам страціў зрок у калоніі №22 у Івацэвічах. Пра гэта піша “Радыё Свабода” са спасылкай на яго сваячку, інфармаваную пра стан мужчыны.

«Раней бачыў святло і цень, цяпер ужо і гэтага няма. А пра тое, як з гэтым спраўляецца, нічога не расказвае, абыходзіць гэтую цяжкую тэму. Тры дні таму даслаў ліст, павіншаваў унукаў з днямі нараджэння. Некалькі слоў нават напісаў сваёй рукой, праўда, неразборліва ў яго атрымалася, амаль нічога не ўдалося прачытаць, але добра, што спрабуе», – расказала яна.

Паводле яе слоў, Арэшка таксама пакутуе ад павышанага ціску, праблем са спінай і нагамі, а яго стан працягвае пагаршацца. Адміністрацыя калоніі прапаноўвала Вячаславу адправіцца ў бальніцу этапам, аднак ён адмовіўся. Яна патлумачыла гэта асцярогамі, што ён можа не вытрымаць этапавання.

У верасні пра стан Арэшкі расказваў журналіст і былы палітвязень Дзмітрый Семчанка, які адбываў пакаранне ў той жа калоніі. Паводле яго слоў, у Вячаслава адбылося адслаенне сятчаткі, пасля чаго зрок працягваў пагаршацца. Семчанка расказваў, што Арэшку даводзілася суправаджаць нават да кухні і да тэлефона, а ў цемры ён ужо не мог самастойна выйсці ў туалет.

Вячаслава Арэшку затрымалі ў красавіку 2022 года. Яго абвінавацілі па трох артыкулах Крымінальнага кодэкса, у тым ліку па артыкуле аб стварэнні экстрэмісцкага фарміравання альбо ўдзеле ў ім. У 2023 годзе яго прыгаварылі да 8 гадоў пазбаўлення волі. Трэці год ён знаходзіцца ў калоніі №22 у Івацэвічах.

Праваабаронцы ўключылі Арэшку ў спіс са 170 палітвязняў, асабліва ўразлівых з-за стану здароўя, і дамагаюцца яго найхутчэйшага вызвалення.

Паводле даных крыніц “Свабоды”, на працягу года Арэшка фігураваў у спісах зняволеных, вызвалення якіх дамагаліся пры ўдзеле амерыканскага боку. Аднак ён дагэтуль застаецца ў зняволенні, у адрозненне ад іншых актывістаў незалежных прафсаюзаў, якія праходзілі па адной з ім справе.