Photo by Milad Fakurian on Unsplash
Ініцыятыва былых сілавікоў BELPOL прадставіла на III Кангрэсе па палітвязнях #WithoutJustCause, які праходзіць у Вільні, даклад «Пра рэальны маштаб палітычных рэпрэсій у Беларусі».
Ён падрыхтаваны пры ўдзеле Прадстаўніцтва Аб’яднанага Пераходнага Кабінета па сацыяльнай палітыцы і ініцыятывы Volnyja, з выкарыстаннем матэрыялаў праваабарончых арганізацый Dissidentby і «Вясна».
“Дадзены даклад закліканы дапамагчы правільна разабрацца ў беларускай рэчаіснасці, бо праблематыка палітычных рэпрэсій у Беларусі і палітвязняў многімі разумеецца няправільна, насамрэч яна значна шырэйшая, чым падаецца грамадскасці. У рэальнасці ад палітычных рэпрэсій у нашай краіне пацярпелі сотні тысяч чалавек”, – пракаментавалі ў BELPOL.
У дакуменце раскрываецца фактычны маштаб палітычных рэпрэсій, пазначаныя катэгорыі рэпрэсаваных, якія часта не называюцца; ідзе гаворка пра фіктыўны характар так званага «вызвалення» і «амніставання» палітвязняў.
У дакладзе гаворыцца, што з мая 2020 года па сакавік 2026 года 9564 чалавекі прайшлі праз крымінальны пераслед па палітычных матывах. У гэты лік уключаныя 911 цяперашніх палітвязняў, 3660 былых палітвязняў і 5023 чалавекі, якія не былі прызнаныя палітычнымі вязнямі.
У базу “БЕСпарадкі” ўключаныя больш за 100 тыс. чалавек, з іх больш за 50 тыс. былі падвергнутыя адміністрацыйным затрыманням і арыштам. Людзі, унесеныя ў базу, сутыкаюцца з абмежаваннем у правах, напрыклад, пры працаўладкаванні.