Беларусь хоча абмяркоўваць з Літвой выкарыстанне транзітных магчымасцяў. Пра гэта заявіў намеснік міністра замежных спраў Ігар Сакрэта, даючы каментар па выніках сустрэчы літоўскіх і польскіх перавозчыкаў з прэм’ер-міністрам Аляксандрам Турчыным. Падставай для яе стала сітуацыя з грузавікамі, якія ўтрымліваюцца ў Беларусі з восені мінулага года.
Сакрэта заявіў, што беларускі бок прыме рашэнне ў дачыненні да грузавікоў. Таксама ён падверг крытыцы Літву за нежаданне кантактаваць на ўзроўні МЗС. Намеснік міністра адзначыў, што кантакты на ўзроўні прадстаўнікоў памежных атрадаў не вырашаюць галоўных праблем.
“Але яны не вырашаюць галоўную праблему, якая запісана ў нашых дамовах аб рэжыме дзяржаўнай мяжы з Літвой і адпаведных пагадненнях з польскім бокам. Мы, натуральна, будзем абмяркоўваць перспектывы работы на мяжы, магчымасці выкарыстання ў тым ліку транзітных магчымасцяў Літоўскай Рэспублікі. Гэта вялікі комплекс пытанняў, якія выходзяць за межы паўнамоцтваў памежнікаў”, — сказаў Сакрэта, перадае БелТА.
Перад гэтым ён распавёў, што Мінск і Вільнюс маюць розны погляд на паветраную кантрабанду цыгарэт. Калі для Літвы гэта гібрыдная пагроза, то для Беларусі — дзейнасць кантрабандыстаў.
“Пытанняў у двухбаковых адносінах з Літвой маса. Гэта і пытанні бяспекі, і праваахоўных органаў, гэта і пытанні, напэўна, надакучлівых ужо ўсім паветраных шароў, якімі дастаўляецца кантрабанда цыгарэт. Нам не дазваляе дамовіцца тое, што ў нас адрозніваецца вызначэнне таго, што адбываецца сёння на мяжы. Літоўскаму боку па нейкай прычыне выгадна лічыць гэта гібрыднай пагрозай, бо за пагрозу шчодра плацяць у Еўропе, гэта шакіруе, гэта ўсіх уражвае і не патрабуе дадатковых дыскусій.
А мы ж лічым, што маем справу са звычайнай трансгранічнай злачыннасцю, у якой удзельнічаюць прадстаўнікі розных краін. Калі ёсць розніца ў цане, заўсёды будзе спакуса нешта паставіць у абыход і зарабіць на гэтым. Гэта, уласна, было заўсёды на сумеснай мяжы, пакуль была розніца ў цане”, — сказаў ён.
Сакрэта дадаў, што змагацца з трансгранічнай злачыннасцю трэба сумесна, праз супрацоўніцтва і дыялог.
“Змагацца з гэтым можна звычайным спосабам, стандартным, калі мытня, памежнікі, праваахоўнікі, спецыяльныя службы размаўляюць адзін з адным, інфармуюць пра каналы, абменьваюцца аператыўнай інфармацыяй. Тады вынік будзе лепшы. Але гэта калі планаваць працу на доўгую перспектыву.
А калі кан’юнктурна, тады патрэбна інфармацыйная бомба, якая выбухае і прыцягвае вельмі шмат увагі ў краінах Еўрасаюза. І гэта зусім іншыя грошы. Мы ж кажам: давайце працаваць разам і зарабляць на грузаперавозках, на сумеснай навуковай і культурнай дзейнасці. Давайце адкрыем мяжу і зробім яе прадказальнай і бяспечнай для грамадзян усіх краін — не толькі для Беларусі, Літвы і Польшчы”, — сказаў ён.
