Мінчаніна прысудзілі да папраўчых работ за адмову ехаць на вайсковыя зборы праз рэлігійныя перакананні

Рэдакцыя Reform.news · 2 чэрвеня 2026, 18:14

https://reform.news/be/minchanina-prysudzili-da-papra-chyh-rabot-za-admovu-ehac-na-vajskovyja-zbory-praz-rjeligijnyja-perakananni/

Суд у Мінску прысудзіў 38-гадовага мужчыну да шасці месяцаў папраўчых работ за адмову ехаць на вайсковыя зборы, паведамляе агенцтва «Мінск-Навіны».

У кастрычніку 2025 года мінчанін, які працуе грузчыкам у краме, атрымаў позву на зборы. 7 кастрычніка ён прыйшоў у ваенкамат, але адмовіўся ехаць на зборы, заявіўшы, што гэта супярэчыць яго рэлігійным перакананням.

У дачыненні да мужчыны ўзбудзілі крымінальную справу. На судзе ён не прызнаў віны. Суд прызнаў мінчаніна вінаватым ва ўхіленні ваеннаабавязанага ад яўкі на зборы і прысудзіў яго да шасці месяцаў папраўчых работ з утрыманнем у даход дзяржавы 20% ад заробку.