Фота: facebook.com/mara.tamkovich
Беларуская рэжысёрка Мара Тамковіч паведаміла ў сацсетках, што яна атрымала прэмію Гільдыі польскіх рэжысёраў за стужку «Пад шэрым небам» пра беларускіх зняволеных журналістаў.
Прэмія носіць імя Кшыштафа Краўзэ і накіравана на тое, каб ацаніць аўтараў, якія абапіраюцца на каштоўнасці, выяўленыя ў працах гэтага вялікага польскага рэжысёра.
«Для мяне вялікі гонар атрымаць такое прызнанне ад маіх паважаных калегаў. Дзякуй Гільдыі польскіх рэжысёраў і ўсім, хто прагаласаваў за фільм», – піша рэжысёрка і перадае віншаванні здымачнай групе і акцёрскаму складу, бо гэта прызнанне і іх працы. Таксама яна перадае падзяку Польскаму інстытуту кінамастацтва за фінансаванне фільма і медыякарпарацыі за тое, што яны ўзялі на сябе рызыку і спрадзюсавалі яго.
«Каця Андрэева і Ігар Ільяш, гэта заўсёды было для вас. Не магу дачакацца, калі вы зноў здабудзеце свабоду», – падсумоўвае свой допіс Мара Тамковіч.
На сайце Гільдыі польскіх рэжысёраў паведамляецца, што Мара Тамковіч «з глыбокім пачуццём адказнасці бязлітасна даследуе праўдзівасць сувязі і сілу адданасці».
«Фільм Тамковіч вельмі сціплы, амаль мінімалістычны ў фармальным плане. У ім няма упрыгажэнняў, няма феерверкаў, няма эфектаў. Рэжысёр паслядоўна стрымлівае імкненне да пастановачнага імпульсу – прытрымліваецца рэпарцёрскага тону, блізкага да дакументальнага. Гэта ясна відаць, калі падчас фінальных тытраў з’яўляюцца архіўныя кадры з тэлебачання «Белсат» і з рэальнага судовага працэсу. Яны мала чым адрозніваюцца ад сцэн з фільма.
Такая форма, як у ранніх фільмах Кесьлёўскага, дазваляе засяродзіцца на падзеях і персанажах гэтай драмы. У гледачоў можа скласціся ўражанне, што яны прабіраюцца разам з героямі праз сапраўдны кафкаўскі лабірынт таталітарнай судовай сістэмы.
Фільм Тамковіч, які глядзяць у Польшчы, прымушае крыху па-іншаму думаць аб волі і аб тым, што тут можна свабодна казаць усё, што заўгодна, і тут могуць стварацца такія карціны. Па гэтых дзвюх прычынах гэта вельмі важны фільм», – цытуе Гільдыя польскіх рэжысёраў рэпартаж Пшэмыслава Гульды з «Gazeta Wyborcza».
Падпісвайцеся на культурныя навіны Reform.news у Telegram