Скриншот видео
Аляксандр Лукашэнка расказаў дзяржсакратару СД Сяргею Глазьеву, што перадаваў французскаму боку пасланне ад прэзідэнта РФ Уладзіміра Пуціна. Амаль усю публічную частку сустрэчы Лукашэнка прысвяціў не маючаму адбыцца пасяджэнню Вышэйшага дзяржсавета Саюзнай дзяржавы, а сваім разважанням пра сусветную палітыку.
Ён зноў даваў прэзідэнту ЗША Дональду Трампу парады наконт Венесуэлы, тлумачыў, чаму не паедзе на Савет міру, а таксама запэўніваў Глазьева, што Мінск ад Масквы ніхто не адарве і на перамовах з ЗША Лукашэнка вырашае свае праблемы не за кошт Расіі. Лукашэнка не абмінуў і абрынуцца на міжнародныя арганізацыі. Ён назваў ААН нікчэмнай, а АБСЕ абвінаваціў у тым, што яна не змагла зрабіць сітуацыю ў Еўропе бесканфліктнай і спакойнай.
Лукашэнка таксама негатыўна выказаўся ў адрас Еўрасаюза. Ён паўтарыў свой тэзіс, што ЕС павінен супрацоўнічаць з Беларуссю і Расіяй, бо ў Расіі сыравіна, а ў Еўрасаюзе — тэхналогіі.
“Вы вазьміце цяпер гэтую Еўропу. Яе рвуць на часткі, разбіць, прыбраць, каб ні еўра не было, ні эканомікі, нічога не было. Каму гэта першаму шкода? Амерыканцам. І гэта ж не першы год, гэта ж пастаянна. І не Трамп ініцыятарам быў, што ў захапленні, што развіваецца такі эканамічны асяродак магутны, тэхналагічна развітая тэрыторыя, сур’ёзны канкурэнт для ўсіх. Адзіная, з кім яны маглі мець зносіны, сябраваць і размаўляць — таксама мною сказана год ці паўгода таму назад — Расія. Тут — рэсурсы, у вас — найвышэйшыя тэхналогіі. Давайце разам супрацоўнічаць. Вось гэта еўразійскі рэгіён. І гэта была б самая магутная арганізацыя. Чаго яны хацелі?” — сказаў ён.
“Цяпер адумаўся Макрон ці яшчэ хтосьці на захадзе сваёй кар’еры: будзем наладжваць з Расіяй кантакты, будзем размаўляць. Дык ад гэтага ніхто не адмаўляўся. Я быў у эпіцэнтры гэтага. Некаторыя пытанні проста праз мяне вырашаліся. Французы сюды прыязджалі. Я перадаваў ім мэсэдж не толькі ад сябе, але і ад Пуціна, што ну, давайце. Не трэба.
Вось Трамп паспрабаваў да міру нас падштурхнуць ва Украіне. А ім не трэба гэта. Вось у чым прычына і АБСЕ. Дык вось, калі Савет міру першым сваім крокам зробіць крок да актывізацыі сваёй дзейнасці, усе адтуль сыдуць, пяройдуць сюды, калі будзе вынік. Выніку гэтага няма. Няма АБСЕ, ды і Арганізацыі Аб’яднаных Нацый фактычна. І мы чагосьці хочам захаваць. Ну так, пастаянных членаў Савета Бяспекі, можа, гэта і задавальняе сітуацыя ў ААН. Але іншым краінам?
Колькі там, пяць членаў Савета Бяспекі? Ну хочуць косць кінуць — там сем-восем зрабіць. Але гэта нічога не зменіць. Пры тых рашэннях, якія прымаюцца кансэнсусам, дзе ёсць права вета. А зрабіць так, каб не было права вета, ні ў якім разе нельга. Ні ў якім разе нельга пры той сітуацыі, якая сёння складваецца. Так што мая пазіцыя такая, што Арганізацыя Аб’яднаных Нацый — гэта нікчэмная арганізацыя, ніякіх пытанняў не вырашае і не вырашыць. Ну, іншай няма. А вось з АБСЕ можна было б пачаць тым больш своечасова: у Еўропе турбулентнасць такая, што трэба ўціхамірваць гэты рэгіён і займацца трэба. Гэта мая кропка гледжання. І на рэйкі міру, і вось работу ў Еўропе, дзе мы жывём — Беларусь у цэнтры Еўропы геаграфічна — нас гэта хвалюе, таму мы пагадзіліся быць у Савеце міру”, — сказаў ён.
На мінулым тыдні ў МЗС паведамілі, што 5-6 лютага ў Мінску па запрашэнні беларускага боку знаходзіўся з візітам дырэктар дэпартамента кантынентальнай Еўропы галоўнага дэпартамента па палітычных пытаннях і пытаннях бяспекі МЗС Францыі Брыс Рокфёй. Паводле інфармацыі беларускага знешнепалітычнага ведамства, ён сустракаўся з намеснікам міністра замежных спраў і прадстаўнікамі экспертна-аналітычнай супольнасці. Варта адзначыць, што 3 лютага дыпламатычны дарадца прэзідэнта Францыі Эманюэль Бон наведаў Маскву для перамоваў з памочнікам прэзідэнта РФ Юрыем Ушаковым.