Фото: t.me/CabinetBelarus
Намеснік кіраўніцы Аб’яднанага пераходнага кабінета, кіраўнік Народнага антыкрызіснага ўпраўлення Павел Латушка правёў у Літве шэраг сустрэч з афіцыйнымі асобамі краіны.
На сустрэчы са спікерам літоўскага Сейма Юозасам Олекасам палітык выказаў удзячнасць за падтрымку палітычных вязняў, дэпартаваных на тэрыторыю Літвы, і за пазіцыю па прыцягненні рэжыму Лукашэнкі да адказнасці.
Спікер пацвердзіў поўную падтрымку дэмакратычных сіл Беларусі і адзначыў, што парламент Літвы заўсёды адкрыты для правядзення мерапрыемстваў у падтрымку беларускага дэмакратычнага руху. Ён таксама падкрэсліў, што парламент падтрымлівае пазіцыю літоўскага ўрада адносна адказнасці рэжыму і працягу санкцыйнага ціску.
Бакі таксама абмеркавалі пагрозу бяспецы Літвы з боку рэжыму Лукашэнкі.
Латушка праінфармаваў спікера пра вынікі выбараў у Каардынацыйную раду і пра працу па прыцягненні Лукашэнкі да адказнасці за злачынствы супраць беларускага народа, незаконнае перамяшчэнне ўкраінскіх дзяцей і акт агрэсіі супраць Украіны.
У сустрэчы таксама прынялі ўдзел дырэктар віленскага Офіса Святланы Ціханоўскай Дзяніс Кучынскі і намесніца кіраўніка міжнароднай камісіі Каардынацыйнай рады Ірына Халопіца.
На сустрэчы з міністрам юстыцыі Літвы Рытай Тамашунене Латушка падзякаваў краіне за перадачу беларускай сітуацыі ў офіс пракурора Міжнароднага крымінальнага суда.
«Менавіта дзякуючы Міністэрству юстыцыі і ўраду Літвы тысячы беларусаў, якія пацярпелі ад рэпрэсій і дэпартацыі, атрымалі надзею на міжнароднае правасуддзе», — заявіў ён.
Бакі таксама абмеркавалі прасоўванне расследавання ў МКС і іншыя механізмы прыцягнення рэжыму да міжнароднай адказнасці, у тым ліку ў Міжнародным судзе ААН.
Асобна бакі абмеркавалі іншыя магчымасці прыцягнення рэжыму да міжнароднай адказнасці, у тым ліку ў рамках Міжнароднага суда ААН. Гаворка ішла пра адказнасць як за злачынствы супраць беларусаў, так і за парушэнні міжнародных абавязацельстваў у дачыненні да Літвы.