Павел Латушко. Фото: t.me/CabinetBelarus
Намеснік кіраўніка Аб’яднанага пераходнага кабінета Беларусі, кіраўнік НАУ Павел Латушка на сустрэчы з паслом Літвы ў Польшчы Вальдэмарасам Сарапінасам падкрэсліў важнасць працягу ціску на рэжым Аляксандра Лукашэнкі да таго часу, пакуль ён не пойдзе на рэальныя, а не касметычныя ўнутрыпалітычныя змены.
У сустрэчы таксама ўдзельнічаў спікер Каардынацыйнай Рады Арцём Брухан.
У ходзе сустрэчы Латушка падзякаваў Літве за шматгадовую падтрымку дэмакратычных сіл Беларусі і дэмакратычных зменаў у нашай краіне. Таксама ён выказаў надзею на працяг стратэгічнага ўзаемадзеяння з боку Літвы з беларускімі дэмсіламі.
«Літва для нас — адзін з галоўных саюзнікаў у справе набліжэння дэмакратычных перамен у Беларусі і падтрымкі дэмакратычных сіл, якія працягваюць змагацца за свабоду беларускага народа», — падкрэсліў ён.
Падчас сустрэчы былі прадстаўлены падыходы да пачатку нацыянальнага дыялогу для выхаду з глыбокага ўнутрыпалітычнага крызісу ў Беларусі праз выкарыстанне інструмента круглага стала.
Таксама абмяркоўваліся магчымыя далейшыя дзеянні па вызваленні палітвязняў. Асаблівая ўвага была нададзена прасоўванню пытанняў адказнасці для прадстаўнікоў рэжыму Лукашэнкі.
Павел Латушка і Арцём Брухан праінфармавалі пасла Літвы аб ходзе падрыхтоўкі да выбараў у Каардынацыйную раду, якія пройдуць з 11 па 17 мая 2026 года. Павел Латушка падзякаваў літоўскім дэпутатам за падтрымку ў дзейнасці дэлегацыі КР у ПАСЕ падчас зімовай сесіі, якая прайшла на мінулым тыдні.
Латушка таксама праінфармаваў літоўскі бок аб эканамічнай сітуацыі ў Беларусі на фоне санкцый, паведамілі ў прэс-службе АПК.