Фото: t.me/firepointofficial
У Падольску Маскоўскай вобласці пасля трапляння беспілотніка адбылося ўзгаранне на лагістычным аб’екце Wildberries у індустрыяльным парку «Каледзіна». Пра гэта паведаміў губернатар Маскоўскай вобласці Андрэй Вараб’ёў.
Паводле яго слоў, у выніку падзення беспілотніка на тэрыторыю прыватнага дома ў Раменскай муніцыпальнай акрузе загінуў 83-гадовы мужчына. Яшчэ тры чалавекі пацярпелі ў Падольску, у іх асколачныя і іншыя раненні.
Пашкоджанні таксама зафіксаваныя ў Падольску, Домадзедаве, Кашыры, Чэхаве і Ступіне. У Домадзедаве адбылося ўзгаранне склада з медыкаментамі, у Кашыры пашкоджаны будынак аддзела паліцыі. Паводле сцвярджэння губернатара, усяго за ноч сілы СПА і РЭБ збілі і падавілі 187 беспілотнікаў.
У прэс-службе Аб’яднанай кампаніі Wildberries & Russ паведамілі, што на аб’екце загадзя правялі эвакуацыю супрацоўнікаў у адпаведнасці з патрабаваннямі бяспекі. У выніку атакі ніхто з работнікаў не пацярпеў. На месцы працуюць пажарныя разлікі.
«Лагістычныя ланцужкі перабудаваныя, прыём паставак і адгрузка заказаў ажыццяўляюцца на іншых аб’ектах», — гаворыцца ў прэс-рэлізе.
Украінская кампанія Fire Point заявіла, што лагістычны хаб Wildberries у Каледзіне быў паражаны ўкраінскімі беспілотнікамі FP-1. Паводле сцвярджэння кампаніі, гаворка ідзе пра адзін з найбуйнейшых лагістычных комплексаў Wildberries плошчай каля 250 тыс. кв. м. Аб’ект выкарыстоўваецца для захоўвання, сартавання і размеркавання тавараў двайнога прызначэння, заявілі ў прэс-службе.
Паводле слоў мэра Масквы Сяргея Сабяніна, з вечара да 6:30 у бок Маскоўскага рэгіёна ляцелі каля 600 БПЛА, 201 з іх быў знішчаны ў рэгіёне.