Галоўная служба ў Будслаўскім касцёле Унебаўзяцця Найсвяцейшай Панны Марыі ў рамках штогадовага каталіцкага фэсту ўпершыню прайшла з удзелам кіраўніка Беларускай праваслаўнай царквы мітрапаліта Веніяміна, адзначае «Хрысціянская візія».
На імшы таксама прысутнічалі кіраўнікі іўдзейскай і мусульманскай канфесій у Беларусі, дзяржаўныя чыноўнікі, прадстаўнікі праўладных арганізацый і некалькі паслоў замежных дзяржаў, у тым ліку пасол Расіі Барыс Грызлоў.
Спіс ганаровых гасцей агучыў у прывітальнай прамове мітрапаліт Мінска-Магілёўскі арцыбіскуп Юзаф Станеўскі. Сярод згаданых ім — намеснік упаўнаважанага па справах рэлігій і нацыянальнасцяў Сяргей Герасіменя, старшыня Мядзельскага райвыканкама Аляксандр Прановіч, а таксама прадстаўнікі Беларускага саюза жанчын і Фонду міру.
У пропаведзі каталіцкі іерарх акцэнтаваў увагу на тым, што з гэтага года Будслаў з’яўляецца «духоўным цэнтрам», і падкрэсліў, што такі статус яму быў нададзены па ініцыятыве Аляксандра Лукашэнкі.
Паводле яго слоў, рэстаўрацыя касцёла і стварэнне духоўнага цэнтра ў Будславе фінансуюцца дзяржавай і Каталіцкім касцёлам у прапорцыі «50 на 50». Станеўскі таксама паведаміў, што ў касцёле ўжо адкрыты музей, а ў далейшым плануецца будаўніцтва Дома пілігрыма.
Даныя аб дзяржаўным фінансаванні пакуль пацверджаныя толькі часткова. Нядаўна Лукашэнка падпісаў указ аб падтрымцы праваслаўнага і каталіцкага «духоўных цэнтраў». Паводле ўказа, на рэстаўрацыю сабора ў Жыровічах накіравана 3,4 мільёна рублёў, а на работы ў касцёле ў Будславе — каля 260 тысяч рублёў.
