Изображение: Совет Республики
Старшыня Савета Рэспублікі Наталля Качанава сустрэлася з дэлегацыяй Малі, якая знаходзіцца ў Беларусі. Дэлегацыю ўзначальвае віцэ-старшыня Камісіі нацыянальнай абароны, бяспекі і грамадзянскай абароны Нацыянальнага пераходнага савета Фуссейну Уаттар.
Як паведамілі ў прэс-службе СР, бакі абмеркавалі пытанні беларуска-малійскага міжпарламенцкага і гандлёва-эканамічнага супрацоўніцтва.
Наталля Качанава падкрэсліла, што Беларусь актыўна прапануе свае тавары і паслугі краінам Афрыкі. У якасці прыкладу яна прывяла ўзаемадзеянне з Зімбабвэ.
“Вы ведаеце, што мы з’яўляемся найбуйнейшымі пастаўшчыкамі сельскагаспадарчай тэхнікі і гатовыя да супрацоўніцтва, роўна так жа, як і па прадуктах харчавання. Сёння Беларусь забяспечвае прадуктамі харчавання не толькі сябе, але можа забяспечыць дзве з паловай такія Беларусі. Сельскагаспадарчую прадукцыю мы пастаўляем у 116 краін свету. У мінулым годзе паставілі на экспарт на 10 мільярдаў долараў», – сказала яна.
Качанава таксама прывітала любыя ідэі па стварэнні сумесных прадпрыемстваў. Яна выказала гатоўнасць падпісаць мемарандум аб супрацоўніцтве.
Фуссейну Уаттар пасля сустрэчы паведаміў, што ў Малі развіваецца горназдабыўная прамысловасць і яго краіна зацікаўлена ў тым, каб наладзіць пастаўкі беларускай тэхнікі без пасярэднікаў. Дэлегацыя наведала БелАЗ, МАЗ.
Нагадаем, Малі ў 2020 і 2021 гадах перажыла два ваенныя перавароты. З тых часоў на чале краіны стаяць ваенныя на чале з Асіімі Гойтай. У маі мінулага года ў Малі былі распушчаны ўсе палітычныя партыі. Летам 2025 года пераходны парламент прадаставіў Гойце пяцігадовы прэзідэнцкі тэрмін, які можа быць падоўжаны без выбараў.