Эстонскі сайт Postimees унеслі ў спіс “экстрэмісцкіх матэрыялаў”

Міністэрства інфармацыі Беларусі працягвае ўносіць у свой спіс “экстрэмісцкіх матэрыялаў” СМІ еўрапейскіх краін.

Нядаўна яго папоўнілі Euronews і польскае дзяржагенцтва РАР. Цяпер надышла чарга найстарэйшага эстонскага выдання Postimees. Газета пачала выходзіць яшчэ ў 1857 годзе, у XXI стагоддзі сайт Postimees з’яўляецца адным з галоўных інтэрнэт-медыя краіны.

Суд Горацкага раёна 6 жніўня вырашыў, што інфармацыйная прадукцыя Postimees уяўляе сабой “экстрэмісцкія матэрыялы”, пасля чаго яго і ўнеслі ў спіс.

Таксама Мінінфарм дадаў у яго:

• акаўнт у TikTok “Валера Беларус”;
• старонку ў Threads “Павел Латушка”;
• акаўнт у Instagram “ruhvolia” (Рух Воля);
• Тelegram-боты “Листовки бот”, “Бот ByProsvet”, “Дистрибьютор бот”, “Чёрная Карта оккупантов” (з лагатыпам), “FrayMarta”;
• акаўнт у Telegram “BELZHD EDITOR”;
• Telegram-канал “ПОГОНЯ”.

Нагадаем, абвінавачанні ў экстрэмізме выкарыстоўваюцца ў Беларусі для пераследу апанентаў Лукашэнкі і іншадумства ў цэлым.