Фото: Unsplash.com
У Беларусі зніжаная пошліна, якая спаганяецца пры падачы заявы аб атрыманні спецыяльнага дазволу для замежнікаў на права занятку працоўнай дзейнасцю, а таксама пры падаўжэнні такога дазволу. Сёння на Нацыянальным прававым інтэрнэт-партале апублікаваная пастанова МУС №193 ад 10 ліпеня, якая набывае моц пасля апублікавання.
Дакументам унесеныя змены ў рэгламент адміністрацыйнай працэдуры 15.4.1 «Атрыманне спецыяльнага дазволу на права занятку працоўнай дзейнасцю ў Рэспубліцы Беларусь», якая ажыццяўляецца ў дачыненні да суб’ектаў гаспадарання.
Калі раней пры ажыццяўленні працэдуры спаганялася дзяржпошліна ў памеры 5 базавых велічынь, то паводле новай пастановы МУС памер дзяржпошліны складае 2 базавыя велічыні.
Таксама змены ўнесеныя ў рэгламент працэдуры 15.4.2 «Аднаразовае падаўжэнне тэрміну дзеяння спецыяльнага дазволу на права занятку працоўнай дзейнасцю ў Рэспубліцы Беларусь», якая ажыццяўляецца ў дачыненні да суб’ектаў гаспадарання.
У гэтым выпадку дзяржпошліна зніжаная з 3 базавых велічынь да 1 базавай велічыні.
Акрамя таго, у рэгламенце абедзвюх працэдур з’явілася магчымасць падаваць дакументы і звесткі ў электроннай форме праз адзіны партал электронных паслуг.